भारतमै एसेम्वल भयो भल्भोको पहिलो इलेक्ट्रिक एसयूभी एक्ससी४० रिचार्ज, रेन्ज ४०० किलोमिटर

भल्भो कार इण्डियाले गत जुलाई महिनामा लन्च गरेकोे पहिलो इलेक्ट्रिक एसयूभी एक्ससी४० रिचार्ज लाई भारतमै एसेम्वल गरेको छ । जसलाई भारतीय बजारमा आज लन्च गरिएको छ । यो एसयूभीलाई भारतीय बजारमा ५५ लाख ९० हजार रुपैयाँ निर्धारण गरिएको थियो । जुन लन्च भएको केही घन्टाभित्रै एक सय ५० युनिट वुक भएको थियो ।

यो एसयूभीमा भल्भोले ७८ किलोवाट आवर क्षमताको ठूलो व्याट्री प्याक जडान गरेको छ । एकपटक फूल चार्ज गर्दा ४०० किलोमिटर कुद्ने दावी गरिएको यो एसयूभी सेग्मेन्टकै सर्वाधिक पावरफुल समेत मानिन्छ । यसको अधिकतम पावर ४०८ एचपी र टर्क ६६० एनएम रहेको छ ।

प्रतिघन्टा १८० किलोमिटर सम्मको गतिमा हाँक्न सकिने यो कारले मोटर चल्न थालेको शून्यदेखी ५ सेकेन्ड भित्र १०० किलोमिटरको गति पकड्न सक्ने दावी गरिएको छ । हाल बजारमा उपलब्ध यहि सेग्मेन्टका अन्य इलेक्ट्रिक एसयूभीको तुलनामा एक्ससी ४० रिचार्ज सर्वाधिक तेज गतिमा कुद्न सक्ने एसयूभी समेत रहेको जनाइएको छ ।

यो एसयूभीको प्रतिस्पर्धीका रुपमा किया इभी६, ज्यागुअर आई–पेस र मर्सिडिज इक्यूसी रहेका छन् । स्विडिस अटो निर्माता भल्भोले भारतीय बजारमा अन्य इलेक्ट्रिक कारलाई समेत क्रमबद्ध रुपमा लन्च गर्दै जाने जनाएको छ ।