नारायणी नदीमा सिग्नेचर पुल बनाउन ठेक्का आह्वान

पूर्व–पश्चिम राजमार्ग अन्तर्गत नारायणी नदीमा सिग्नेचर पुल बनाउन ठेक्का आह्वान भएको छ । हाल रहेको पुरानो पुलको आडैमा सिग्नेचर पुल बनाउने गरी ठेक्का आह्वान भएको हो । सडक विभागको पुल शाखाले डिजाइन एण्ड बिल्डको मोडलमा सिग्नेचर पुल बनाउने गरी आज ठेक्का आह्वान गरेको हो ।

बहुप्रतिक्षित सिग्नेचर पुल निर्माणको लागि ठेक्का आह्वान भएपछि भरतपुर महानगरपालिकाकी मेयर रेनु दाहालले बधाई दिएकी छन् ।

नारायणी नदीको पुल निकै पुरानो भइसकेको छ । अहिलेको पुलमा ठूलो दुर्घटना हुनसक्ने भन्दै नयाँ पुल निर्माणका लागि पटकपटक नगरिक स्तरबाट दबाब दिँदै आइएको थियो ।

पुलको कुल लम्बाइ ४०० मिटर र चौडाइ चार लेनको हुनेछ । उक्त पुलमा रातको समयमा आकर्षक बत्तीले सजाउने योजनासमेत बनाइएको छ ।

विसं २०३६ सालमा बनेको २ लेनको नारायणी पुलको दुवैतर्फ होचो रेलिङसहितको फुटपाथसमेत छ । हालको पुलको आयु करिब ७० वर्ष हुने प्राविधिकहरूले बताए पनि यसमा हुने ट्राफिक चाप र सवारीको ओजनलाई हेर्दा पुल जीर्ण बन्दै गएको देखिन्छ ।