महिन्द्राले गर्दैछ ५ नयाँ इलेक्ट्रिक एसयूभी ल्याउने तयारी

महिन्द्रा एण्ड महिन्द्रा कम्पनीले आगामी केही वर्षमा इलेक्ट्रिक सवारीमा आफ्नो उत्पादन बढाउने भएको छ । कम्पनीले ईभी सेगमेन्टमा अत्यधिक लगानी गर्ने तयारी गरिरहेको बताएको छ ।

कम्पनीले केही वर्षमा ग्राहकहरु विस्तारै इलेक्ट्रिक सवारी साधनमा अग्रसर हुने अपेक्षा गरेको छ । केही वर्षमा २५ प्रतिशत ग्राहकहरु इलेक्ट्रिक एसयूभी खरिद गर्ने उत्सुक्ता जाग्ने र २ देखि ३ वर्षमा यस्को प्रभाव बढी हुने कम्पनीको भनाइ छ ।

कम्पनीले अबको ५ वर्षमा आफ्नो एसयूभीमध्ये २० – ३० प्रतिशत इलेक्ट्रिक हुने अपेक्षा गरेको छ । इको–फ्रेन्डली गाडीमा ठूलो बाजी लगाउँदै महिन्द्राले ५ वटा नयाँ इलेक्ट्रिक स्पोर्ट्स युटिलिटी भेइकल पेश गर्ने तयारी गरिरहेको छ । जसमध्ये ४ वटा डिसेम्बर २०२४ र २०२६ बीचमा बजारमा आउने अपेक्षा गरिएको छ । फ्लीट डिभिजन (जहाँ धेरै कारहरूको आवश्यकता पर्छ) चाँडै इलेक्ट्रिकमा सर्ने पनि जानकारी दिइएको छ ।

बजारमा पर्याप्त चार्जिङ स्टेशनको अभावका कारण व्यक्तिगत कारमा इलेक्ट्रिक ह्याचब्याक र सेडानको माग सुस्त हुने अनुमान गरिएको छ । एसयूभी सेग्मेन्टमा इन्ट्रि लेभल कार वा मिड साइजको इलेक्ट्रिक सवारी साधनले बजार ओगट्ने पनि कम्पनीको अपेक्षा छ ।