दुई एसयूभी ‘स्पेसलिस्ट’ले सार्वजनिक गरे एकै दिन इलेक्ट्रिक कार, यस्तो छ महिन्द्रा र जीपको नयाँ इभी

एसयूभी स्पेसलिस्टका रुपमा परिचित अमेरिकन आइकनिक ब्रान्ड जीप र भारतीय ब्राण्ड महिन्द्राले हिँजो एकैदिन नयाँ इलेक्ट्रिक एसयूभी सार्वजनिक गरेका छन् । जीपले एभेन्जर र महिन्द्राले एक्सयूभी ४०० नामबाट यी एसयूभी सार्वजनिक गरेको हो । यी दुवै एसयूभी जीप र महिन्द्राको इलेक्ट्रिक लाइनअपमा नयाँ मोडल हुन् ।

महिन्द्राले सार्वजनिक गरेको एक्सयूभी ४०० लाई कम्पनीले अर्को वर्षको जनवरी महिनादेखी डेलिभरी दिने जनाएको छ भने जीपले अक्टोवर १७ देखीमात्र वुकिङ लिन शुरु गर्ने बताएको छ । यी दुवै एसयूभी ढिलोचाँडो नेपाली बजारमा समेत उपलब्ध हुनेछन् ।

यी २ एसयूभीमध्ये महिन्द्रा एक्सयूभी ४०० मा ३९.४ किलोवाट आवर क्षमताको व्याट्री प्याक तथा ११२ किलोवाट क्षमताको मोटर जडान गरिएको छ । जसको अधिकतम पावर १५० एचपी र टर्क ३१० एनएम रहेको छ । एक्सयूभी ३०० मा आधारित यो नयाँ इलेक्ट्रिक कारले एकपटकको फूल चार्जमा ४५६ किलोमिटर रेन्ज प्रदान गर्ने दावी गरिएको छ ।

५० किलोवाट सम्मको डिसी चार्जर सपोर्ट गर्न सक्नेगरी निर्माण गरिएको यो एसयूभीमा ३.३ किलोवाट क्षमताको १६ एम्पियर चार्जर दिइएको छ । उक्त चार्जरको साहयताले गाडीलाई १३ घण्टामा फुल चार्ज गर्न सकिन्छ । यसैगरी ७.२ किलोवाटको चार्जरले ६ घण्टा ३० मिनेट र ५० किलोवाट क्षमताको डिसी चार्जरले जम्मा ३० मिनेट भित्र सून्यदेखी ८० प्रतिशतसम्म चार्ज गर्न सकिने दावी छ ।

अर्कोतर्फ जीप एभेन्जरमा कम्पनीले कुन साइजको व्याट्री उपलब्ध गराएको छ भन्ने विषयमा कुनै जानकारी नदिएपनि मोटर भने ७० किलोवाट क्षमताको जडान गरेको जनाएको छ । यो एसयूभीलाई एकपटक फूल चार्ज गर्दा ४०० किलोमिटर रेन्ज प्रदान गर्ने दावी छ ।

जीपले एभेन्जरलाई प्लग इन हाइव्रिड मोडलमा समेत सार्वजनि गरेको छ । जसमा १.२ लिटर क्षमतको इन्जिन र १७ किलोवाट आवर क्षमताको व्याट्री प्याक जडान हुनेछ । साथै उसले २ वर्षपछि बजारमा ल्याउनेगरी रिकोन र वागिनार एस कन्सेप्ट समेत सार्वजनिक गरेको छ ।

यी दुई व्राण्डमध्ये जीप उच्च क्षमताको विलासी एसयूभी निर्माणका लागी विश्वभर कहलिएको ब्रान्ड हो भने महिन्द्रा भारतको सवैभन्दा ठूलो एसयुभी उत्पादक हो । विश्व बजारमै एसयूभी सेग्मेन्टका गाडीको माग बढिरहेको अबस्थामा यी दुई ठूला र प्रख्यात व्रान्डले इलेक्ट्रिक एसयूभी उत्पादनमा प्रवेश गरेपछि इभी पारखीमा थप उल्लास छाएको छ ।