यी हुन नेपाली बजारमा उपलब्ध १२ मोडलका इलेक्ट्रिक मोटरसाइकल, नयाँ व्रान्ड पनि थपिँदै

विद्युतिय सवारीको लोकप्रियता बढेसंगै नेपाली बजारमा पछिल्लो समय नयाँनयाँ सेग्मेन्ट र ब्रान्डका यस्ता साधन आयत हुने क्रम बढिरहेको छ । नेपालमा अहिले १ दर्जन बढी फोर ह्विलर र ३ दर्जन हाराहारीमा इलेक्ट्रिक टु ह्विलर बिक्री भैरहेको छ । संख्याका हिसावले टु ह्विलरको उपस्थिती बढ्दै गएपनि यी साधनले कार सेग्मेन्टमा जत्तिको लोकप्रियता भने अझै कमाउन सकिरहेका छैनन् ।

इलेक्ट्रिक टु ह्विलरमा अहिले ग्राहाकलाई सवैभन्दा बढी छनोटको विकल्प स्कुटरमा रहँदै आएको छ । यससंगै मोटरसाइकल भने केही ब्रान्डले मात्र आयत गरी कारोबार गरिरहेका छन । इलेक्ट्रिक मोटरसाइकलमा नेपालको आफ्नै ब्रान्ड यात्रीदेखी कोमाकी, प्योर इभी, सुपर सोको, ओडीसी, मिकु र वान इलेक्ट्रिक सहित आधा दर्जन ब्रान्ड उपलब्ध छन् भने केही नयाँ व्रान्ड समेत भित्रिने तयारीमा रहेको वुझिएको छ ।

यात्रीका २ मोडल
यी ७ व्रान्डका इलेक्ट्रिक मोटरसाइकलमा नेपाली ब्रान्ड यात्रीको पि १ सवैभन्दा महंगो मोडल हो । ३ किलोवाट आवरको व्याट्री र १४ किलोवाट क्षमताको मोटर जडित यो मोटरसाइकलको मूल्य ५ लाख ६५ हजारदेखी ६ लाख १३ हजार रुपैयाँसम्म पर्छ । यो मोटरसाइकलले एकपटकको फुल चार्जमा ११० किलोमिटर रेन्ज प्रदान गर्ने दावी गरिएको छ । यो ब्रान्डले अर्को प्रिमियम मोडल प्रोजेक्ट जीरोलाई भने १९ लाख ४९ हजारमा विक्री गर्दै आइरहेको छ ।

सुपर सोकोका ४ मोडल
इलेक्ट्रिक मोटरसाइकलमा चर्चा कमाउँदै गएको अर्को चिनियाँ ब्रान्ड सुपरसोकोसंग टिसी, टिएस स्ट्रिट हन्टर, टिसी वान्डरर र टिसी म्याक्स गरी कुल ४ वटा मोडल उपलब्ध छन् । जसमध्ये सवैभन्दा सस्तो टिसीमा ३ किलोवाट क्षमताको मोटर र ६० भोल्ट ३० एम्पियर आवरको व्याट्री प्याक जडान गरिएको छ । सिंगल र डवल व्याट्री अप्सनमा उपलब्ध यसको सिंगल व्याट्रीलाई २ लाख ९६ हजार र डवल व्याट्रीलाई ३ लाख ९० हजार रुपैयाँ पर्छ । यो मोटरसाइकलले एकपटकको फुल चार्जमा ८० र १६० किलोमिटर प्रदान गर्ने दावी छ ।

यसैगरी सवैभन्दा महंगो मोडल टिसी म्याक्सको मूल्य ४ लाख ९० हजार रुपैयाँ निर्धारण गरिएको छ । यो मोटरसाइकलमा ५ किलोवाट क्षमताको मोटर र ७५ भोल्ट ४५ एम्पियर आवरको व्याट्री प्याक जडान गरिएको छ । यो मोटरसाइकललाई एकपटक फुल चार्ज गर्दा ११० किलोमिटर रेन्ज प्रदान गर्ने दावी गरिएको छ । यसको अन्य २ मोडल टिएस स्ट्रिट हन्टर सिंगल व्याट्रीको ३ लाख ८० हजार र डवल व्याट्रीको ४ लाख ८० हजार रुपयाँ पर्छ भने टिसी वन्डररको सिंगल व्याट्रीलाई ३ लाख ९० हजार र डवल व्याट्रीलाई ४ लाख ९० हजार रुपैयाँ पर्छ ।

कोमाकी रेन्जर
क्रुजर स्टाइलको कोमकी रेन्जरमा ४ किलोवट क्षमताको मोटर र ७२ भोल्ट ५० एम्पियरको व्याट्री प्याक जडान गरिएको छ । ४ लाख ३५ हजार रुपैँया मूल्य निर्धारण गरिएको यो मोटरसाइकललाई एकपटक फुल चार्ज गर्दा यसले १८० किलोमिटरसम्म रेन्ज प्रदान गर्ने दावी गरिएको छ ।

प्योर इभी इट्राइस्ट ३५०
केही समयअघिमात्र नेपाल भित्रिएको इट्राइस्ट ३५० मा ४ किलोवाट क्षमताको मोटर तथा ३.५ किलोवाट आवरको व्याट्री प्याक रहेको छ । उक्त ब्याट्रीलाई एक पटक फुलचार्ज गर्दा १४० किलोमिटरसम्म गुडाउन सकिने कम्पनीको दावी छ । यो मोटरसाइकलको मूल्य ४ लाख रुपैयाँ निर्धारण गरिएको छ ।

मिकुका २ मोडल
मिकुको म्यक्स र सुपर गरी कुल २ मोडलका मोटरसााइकल उपलब्ध छन् । जसमध्ये म्यक्समा ६० भोल्ट २० एप्मिएरको व्याट्री तथा ८ सय वाट क्षमताको मोटर जडान गरिएको छ । यो मोटरसाइकललाई एकपटक फुल चार्ज गर्दा ६० किलोमिटर रेन्ज प्रदान गर्ने दावी छ । सथै यसको अर्को मोडल सुपरमा ७२ भोल्ट २० एम्पियरको डवल व्याट्री तथा ३ किलोवाट क्षमताको मोटर जडान गरिएको छ । यो मोटरसाइकलले ८० किलोमिटर रेन्ज दिने दावी छ । यी मोटरसाइकलको मूल्य क्रमश २ लाख २४ हजार ९ सय र ३ लाख ९६ हजार ९ सय रुपैयाँ निर्धारण गरिएको छ ।

वान इलेक्ट्रीक क्रिडन
केहि दिनअघिमात्र नेपाल आएको वान इलेक्ट्रीकको क्रिडन मोटरसाइकलमा ५ किलोवाट क्षमताको मोटर र ३ किलोवाट आवरको व्याट्री प्याक दिइएको छ । जसले एक पटकको फुल चार्जमा १२० किलोमिटरसम्म रेन्ज दिने कम्पनीको दावी छ । यसको मूल्य ३ लाख ५० हजार निर्धारण गरिएको छ ।

ओडिसी इभोक्विस
यसअघि नेपाली भित्रिएर कारोबार थालिसकेको यो ब्रान्ड पुन नयाँ वितरकका साथ लन्च हुन लागिरहेको छ । जसको मूल्य हालसम्म सर्वाजनिक गरिएको छैन । यो मोटरसाइकलमा ३ किलोवाट क्षमताको मोटर र ४.२ किलोवाट आवर क्षमताको व्याट्री दिइएको छ । एकपटक फुल चार्ज गर्दा यसले १५० किलोमिटर रेन्ज प्रदान गर्ने दावी छ ।

ओवेन रोर
गोल्छा अर्गनाइजेशन अन्तर्गतको ई–मोटोले आयत गरी नेपाल ल्याउन लागेको ओवेन रोर केही समयपछि सार्वजनिक हुने तयारीमा छ । भारतीय ब्रान्डको यो मोटरसाइकलमा ४.४ किलोवाट आवरको व्याट्री प्याक जडान गरिएको छ । यो मोटरसाइकललाई एकपटप फुल चार्ज गर्दा २०० किलोमिटरसम्म माइलेज दिने दावी गरिएको छ । यो इलेक्ट्रिक मोटरसाइलको टप स्पिड १ सय किलोमिटर प्रतिघन्टा रहेको छ । नेपालमा यो ३ लाख २५ हजार रुपैयाँ आसपासमा लन्च हुनसक्ने अनुमान लगाइएको छ ।