इलेक्ट्रिक टाटा पन्च चाँडै लन्च हुने, यस्तो हुनेछ मूल्य र रेन्जलगायतका विशेषता

टाटा मोटर्सले आफ्नो पोर्टफोलियो तीव्र गतिमा बढाउन थालेको छ । कम्पनीले आगामी २–३ वर्ष भित्र धेरै इलेक्ट्रिक कार लन्च गर्ने योजना बनाएको छ । ती मध्ये टाटा मोटर्सले टाटा पन्च इलेक्ट्रिक कार चाँडै नै लन्च गर्ने भएको छ ।

हाल टाटा मोटर्सको नेक्सन ईभीसँगै टिगोर ईभी पनि बिक्री भइरहेको छ र आगामी दिनमा अल्ट्रोज ईभीसँगै कम्पनीले टाटा पन्च ईभी पनि लन्च गर्ने योजना बनाएको छ ।

मिडिया रिपोर्टका अनुसार नयाँ टाटा पन्च ईभीमा नेक्सन ईभी र टिगोर ईभीमा जस्तै जिप्ट्रोन टेक्नोलोजी हुनेछ र सो इलेक्ट्रिक एसयूभीमा ५५ किलोवाट इलेक्ट्रिक मोटर र २६ किलोवाट लिथियम आयोन ब्याट्री हुने अपेक्षा गरिएको छ ।

सो इन्जिनले ७४ बीएचपी अर्थात ५५ किलोवाट पावर र १७० एनएमको टर्क जेनेरेट गर्छ । सो इलेक्ट्रिक ब्याट्रीले ३०० किलोमिटरसम्म रेन्ज प्रदान गर्छ र यसलाई फास्ट चार्जिङ फिचरसहित लन्च गर्ने अपेक्षा गरिएको छ ।

कम्पनीले आगामी टाटा पन्च इलेक्ट्रिक कार १० लाख भारु मूल्यमा लन्च गर्नेछ । टाटा मोटर्सको पन्च ईभीको बारेमा थप विवरण पछि खुलासा गरिनेछ ।