अब इलेक्ट्रिक स्कुटरमा आगलागीको खतरा कम हुने, कोमाकीले ल्यायो फायरप्रुफ ब्याट्री

केही महिना अघि इलेक्ट्रिक स्कुटरमा आगलागीका धेरै घटना भएपनि अब यो समस्या हट्दै गएको छ । यसको समाधानको लागि इलेक्ट्रिक टु–ह्विल सवारी निर्माता कम्पनी कोमाकीले फायरप्रुफ ब्याट्री लन्च गरेको छ । सो ब्याट्री आगामी महिनादेखि कम्पनीका सबै सवारीमा उपलब्ध हुनेछ ।

कोमाकी इलेक्ट्रिक डिभिजनका निर्देशक गुञ्जन मल्होत्राले यो सफलताले कोमाकीलाई बजारमा भरपर्दो ब्रान्डको रूपमा स्थापित गर्ने बताए । सो ब्याट्रीलाई मोबाइल एपबाट पनि कन्ट्रोल गर्न सकिन्छ । इलेक्ट्रिक सवारी साधन निर्माता कम्पनीले पनि यी ब्याट्री मर्मत गर्न सक्ने भएकाले ढुवानी खर्च पनि बचत हुने उनले बताए ।

सो ब्याट्रीको सेलमा आइरन हुन्छ, जसले ब्याट्रीलाई चरम अवस्थामा आगोबाट सुरक्षित बनाउने कम्पनीले दाबी गरेको छ । साथै ब्याट्रीमा सेलको संख्या पनि एक तिहाइले घटाइएको छ, जसले ब्याट्री प्याक भित्रको तापलाई कम गर्नेछ । यसको लाइफ साइकल २५०० देखि ३००० छ ।

कोमाकीका विभिन्न मोडल बजारमा उपलब्ध छन् । कम्पनीले भेनिस स्कुटरको लागि एक पटक चार्जमा ३०० किलोमिटर र कोमाकी एसई र टीएन९५ मा १८० किलोमिटर माइलेज दिने दाबी गरेको छ । कम्पनीले यो वर्षको सुरुमा रेन्जर र भेनिस इलेक्ट्रिक टु ह्विल र डीटी ३००० लन्च गरेको थियो ।