२०२१ मा भीजी अटोमोबाइल्सले बेच्यो ४,४५६ सवारी साधन

काठमाडौं – भीजी अटोमोबाइल्सले सन् २०२१ मा ४ हजार ४५६ युनिट सवारी साधन बिक्री गरेको छ । यो भन्दा पहिले सन् २०२० मा कम्पनीले ४ हजार २४० युनिट बिक्री गरेको थियो ।

केयर रेटिङस नेपालका अनुसार कम्पनीले ३ हजार ९४८ सवारी साधन डिलरमार्फत र ५०८ सवारी साधन आफ्नै सोरुममार्फत बिक्री गरेको हो ।

चालु आर्थिक वर्षको दोस्रो अर्धवार्षिक अवधिमा बिक्री घटेको कम्पनीको भनाइ छ । बैंकहरुले एलसी खोल्न रोकेको र तरलता अभावको कारण यसमा असर परेको बताइएको छ ।

भीजी अटोमोबाइल्सले नेपाली बजारमा सुजुकी मोटरसाइकल, अतुल अटो थ्री ह्विलर र मोटुल लुब्रिकेन्ट्स बिक्री–वितरण गरिरहेको छ ।

भीजी अटोमोबाइल्सको टु ह्विलरका लागि ५८ डिलर, थ्री ह्विलरका लागि १४ डिलर र लुब्रिकेन्ट्सका लागि ६६ डिलर छन् । कम्पनीको आफ्नै ३ शोरुम छन् भने टु ह्विलरका लागि एक सर्भिस सेन्टर छ ।