टेस्ला र बीएमडब्ल्युको प्रतिस्पर्धी बन्न फक्सवागन आईडी एरो आउने, सिंगल चार्जमा ६२० किमी चल्ने

फक्सवागनले नयाँ इलेक्ट्रिक कार फक्सवागन आईडी एरोको कन्सेप्ट भर्सन सार्वजनिक गरेको छ । चीनबाट वर्ल्ड प्रिमियर गरिएको आईडी एरो पहिलो फुल्ली इलेक्ट्रिक सेडान हुनेछ, जुन प्रिमियम मिड साइज सेगमेन्टमा आउने छ । सो कारको २०२३ को मध्य पश्चात उत्पादन शुरु हुने अनुमान गरिएको छ ।

फक्सवागनको सो नयाँ कार आईडी सिरिजको छैटौं कार हुनेछ । यो भन्दा पहिले आईडी ३, आईडी ४, आईडी ५, आईडी ६ र आइडी लन्च भइसकेको छ ।

आईडी एरोको कन्सेप्ट भर्सन लगभग ५ मिटर लामो छ । यसको डिजाइन एरोडाइनामिक प्रिन्सिपलमा आधारित रहेको कम्पनीको भनाइ छ । फक्सवागन ग्रुपको एमईबी आर्किटेक्चरमा आधारित छ ।

आईडी एरोमा ७७ किलोवाट आवरको लिथियम आयोन ब्याट्री प्याक हुनेछ, जसले सिंगल चार्जमा ६२० किलोमिटर रेन्ज दिनेछ । लन्च पश्चात सो कारले बीएमडब्ल्यु आई४ र टेस्ला मोडल ३ लाई टक्कर दिने बताइएको छ ।

त्यसैगरी यो कार प्रशस्तै स्पेस र आकर्षक इन्टेरियरका साथ उपलब्ध हुने बताइएको छ ।