जेठमा भित्रिए १५३ इलेक्ट्रिक कार, ११ महिनामा भित्रिए १७०४

काठमाडौं – गत जेठ महिनामा नेपाली बजारमा १५३ युनिट इलेक्ट्रिक कार भित्रिएका छन् । यो भन्दा पहिले गत बैशाख महिनामा ७८ इलेक्ट्रिक कार भित्रिएका थिए । गत साउन देखि जेठ सम्म ११ महिनाको अवधिमा १७०४ युनिट इलेक्ट्रिक कार, जिप र भ्यान भित्रिएका छन् ।

भन्सार विभागको तथ्यांक अनुसार जेठ महिना सम्म भित्रिएका इलेक्ट्रिका कार वापत १ अर्ब ३७ करोड राजस्व उठेको छ । इलेक्ट्रिक कारका लागि ५ अर्ब ५ करोड रुपैयाँ भन्दा बढी खर्च भएको छ ।

नेपाली बजारमा ११ महिनाको अवधिमा १०० किलोवाट सम्मका ८९५ इलेक्ट्रिक कार, जिप र भ्यान भित्रिएका छन् । त्यसैगरी १०० देखि १५० किलोवाट सम्मका १३, १०० देखि २०० किलोवाट सम्मका ७९०, २०० देखि ३०० किलोवाट सम्मका ४ र ३०० किलोवाट भन्दा बढी क्षमताका ४ इलेक्ट्रिक कार, जिप र भ्यान भित्रिएका छन् । नेपाली बजारमा भारत, चीन, कोरिया, अमेरिका, जापान, फ्रान्सलगायत मुलुकबाट विद्युतीय कार आयात हुँदै आएको छ। 

विद्युतीय सवारी साधनमा सरकारको अस्थिर नीतिका कारण व्यवसायीहरुमा अन्यौलता छाएको छ । आगामी आर्थिक वर्षको लागि प्रस्तुत गरिएको बजेटमा १०० किलोवाट भन्दा बढी क्षमताका इलेक्ट्रिक सवारी साधनमा बढाइएको करका कारण धेरै व्यवसायी अन्यौलतामा छन् ।