ड्युक २०० मा २० हजार र ड्युक २५० मा ८० हजार बढ्यो मूल्य

काठमाडौं – नेपाली बजारमा उपलब्ध केटीएमका प्रतिष्ठित दुई मोडल ड्युक २०० र ड्युक २५० को मूल्य वृद्धि भएको छ । नेपालका लागि आधिकारिक वितरक हंसराज हुलासचन्द एन्ड कम्पनीले यी दुई बाइकको मूल्य वृद्धि गरेको हो ।

ड्युक २०० को मूल्य पहिले ५ लाख ४४ हजार ९ सय भएकोमा अब ५ लाख ६४ हजार ९ सय रुपैयाँ पुगेको छ । त्यसैगरी ड्युक २५० को मूल्य पहिले ७ लाख ४ हजार ९ सय भएकोमा अब ७ लाख ८४ हजार ९ सय रुपैयाँ पुगेको छ ।

सरकारले हालै सार्वजनिक गरेको नयाँ बजेटमा २०० सीसी भन्दा माथिका मोटरसाइकलको भन्सार र अन्तःशुल्क वृद्धिको असर यी मोटरसाइकलमा देखिएको हो । यो सेग्मेन्टमा २०० देखि २५० सीसी सम्म २० प्रतिशतले अन्तःशुल्क र १० प्रतिशतले भन्सार वृद्धि गरिएको छ भने २५१ देखि ५०० सीसी सम्म भन्सार ४० प्रतिशत र अन्तःशुल्क १० प्रतिशतले वृद्धि भएको छ ।

२०१ देखि २५० सीसीसम्मका मोटरसाइकलमा २० प्रतिशतले अन्तःशुल्क र १० प्रतिशतले भन्सार वृद्धि भए पश्चात अब यी मोटरसाइकलमा अन्तःशुल्क ८० प्रतिशत र भन्सार ४० प्रतिशत लाग्ने भएको छ ।

त्यसैगरी २५१ देखि ५०० सीसीको हकमा भन्सार ३० प्रतिशतबाट बढाएर ७० प्रतिशत र अन्तः शुल्क ८० बाट बढाएर ९० प्रतिशत बनाइएको छ।

नेपाली बजारमा केटीएमका अन्य मोडल समेत उपलब्ध रहेको र आगामी दिनमा अन्य मोडलको समेत मूल्य वृद्धि हुने कम्पनी स्रोतले जानकारी दिएको छ ।