एम्वास्डर कार उत्पादन गर्ने हिन्दुस्तान मोटर्सले अव इभी निर्माण गर्ने

भारतको आइकनिक अटो निर्माता हिन्दुस्तान मोटर्सले इलेक्ट्रिक भेहिलको उत्पादन थाल्ने भएको छ । कुनै समय भारतीय कार वजारको ७५ प्रतिशत भन्दा बढी हिस्सा ओगट्न सफल एम्वास्डर व्रान्डको कार उत्पादन गर्ने यो कम्पनीले पहिलो चरणमा इलेक्ट्रिक स्कुटरको उत्पादन गर्ने जनाइएको छ ।

इलेक्ट्रिक स्कुटर उत्पादनका लागी यो कम्पनीले युरोपको एक प्रतिष्ठित इभी निर्माता कम्पनीसंग सम्झौता समेत गरिसकेको छ । अवको केही समयपछि इलेक्ट्रिक स्कुटर उत्पादन थालिने र त्यसपछि चरणवद्ध रुपमा इलेक्ट्रिक कारसम्म निर्माण गर्ने कम्पनीको योजना छ ।

भारतीय बजारमा अहिले पनि एम्वास्डर व्रान्डका कारहरु ट्याक्सीका रुपमा प्रयोग भएको देख्न सकिन्छ । भारतमा सन् १९५७ देखी संचालनमा आएको यो कम्पनीले २०१४ सम्म सवारीसाधन उत्पादन गर्दै आइरहेको थियो ।

भारतीय बजारमा मारुतीले अल्टो मोडल लन्च गर्नुअघिसम्म एम्वास्डर कारको माग निकै उच्च रहेको थियो । पछि बजारमा अल्टो लगायत अन्य ब्रान्डका सस्ता कारहरु उपलब्ध हुन थालेपछि भने यो ब्रान्डको बिक्री प्रभावित वन्दै गएको हो ।