कोमाकी रेन्जर इलेक्ट्रिक क्रुजर बाइकको डेलिभरी

काठमाडौं – नेपाली बजारमा हालै भित्रिएको भारतीय कम्पनी कोमाकीको क्रुजर इलेक्ट्रिक बाइक कोमाकी रेन्जर ग्राहकलाई डेलिभरी गरिएको छ । नेपालका लागि कोमाकीको आधिकारिक वितरक युनिटी ट्रेडिङ कन्सर्नले पहिले नै प्रि–बुकिङ गरेका केही ग्राहकलाई यो बाइक हस्तान्तरण गरेको हो ।

आगामी दिनमा यो इलेक्ट्रिक बाइक लिन चाहनेले फेरि बुकिङ गर्नु पर्ने र त्यही अनुसार नेपालमा उपलब्ध हुने कम्पनीको भनाइ छ । सामान्यतः बुकिङ गरेको १५ दिन भित्रै यो बाइक उपलब्ध हुनेछ । नेपाली बजारमै पहिलो पटक भित्रिएको इलेक्ट्रिक क्रुजर बाइक भएकाले यसले धेरैको ध्यान खिच्न सफल भएको छ ।

सिंगल चार्जमा १८० किलोमिटर रेन्ज दिने बताइएको सो बाइकको मूल्य ४ लाख ३५ हजार रुपैयाँ तोकिएको छ । यद्यपि यसमा विभिन्न छुटहरु समेत उपलब्ध हुनेछ ।

कोमाकी रेन्जरको आकर्षक लुक, अमेजिङ ब्यालेन्स, स्मुथ राइड र एक्सट्रा अडिनरी फिचरका कारण यो अन्य भन्दा फरक भएको कम्पनीको भनाइ छ । यसमा भएको डबल डिस्क ब्रेक, आईसी इन्जिनकै बाइकमा भए जत्तिकै पावर ब्याकअप र सुपेरियर सस्पेन्सनले बाइकलाई पावरफुल बनाएको छ ।

कम्फर्टेबल सिटिङ, इन्क्लुसिभ ड्युअल स्टोरेज स्पेस, ड्युअल प्यासेन्जर फुटरेस्ट, एलईडी र थप विभिन्न हेडल्याम्प आदिले यो बाइकलाई आरामदायी बनाएको छ । त्यसैगरी यो बाइकमा रियर प्रोटेक्सन गार्ड, रियर टेलल्याम्प गार्ड र रियर ब्याक रेस्ट, फ्रन्ट बडी गार्ड, साइड स्ट्यान्ड सेन्सर, मोबाइल चार्जिङ युनिट, फ्लेम इफेक्ट सहितको ड्युअल साउन्ड पाइप, ट्रिपल हेडल्याम्प, साउन्ड सिस्टमसहितको ब्लुटुथ, गियर मोड, रिभर्स र क्रुज कन्ट्रोल आदि विभिन्न विशेषता यसमा पाउन सकिन्छ ।

यी वाहेक यो बाइकमा रिमोटबाटै लक गर्न सकिने सुविधा, डिस्क ब्रेक, सेल्फ डायग्नोसिस, टेलिस्कोपिक सकर, रिजेनेरेटिभ ब्रेकिङ, एन्टी थेफ्ट लक, अपराइड राइडिङ पोजिसन, प्यासेन्जर सिट, स्याडलब्याग्स, फोर्क माउन्टेड फेयरिङ र साइड स्ट्यान्ड सेन्सर जस्ता आकर्षक फिचर छन् ।

कोमाकी रेन्जरमा ४ हजार वाटको मोटर र ८० एम्पियरको कन्ट्रोलर छ । यसमा ७२ भोल्ट ५० एएचको लिथियम आयोन ब्याट्री छ, जसलाई ५ देखि ६ घण्टामा फुल चार्ज गर्न सकिन्छ ।