इलेक्ट्रिक सवारी साधनमा हुने रिजेनेरेटिभ ब्रेकिङ सिस्टम के हो ? यसले कसरी काम गर्छ ?

कारको ब्रेक प्याडल थिच्दा हाइड्रोलिक ब्रेक प्याडले प्रत्येका पांग्रामा लगाइएको डिस्क ब्रेक वा ड्रम ब्रेकमा घर्षण पैदा गर्छ । घर्षणको कारण कारको गति सुस्त हुन्छ भने यस प्रक्रियाका कारण ब्रेक तातिने पनि गर्छ । रिजेनेरेटिभ ब्रेकिङले भने यसरी कारको गति कम हुँदा निस्कने ऊर्जाको प्रयोग गरी ब्याट्रीलाई चार्ज गर्न सहयोग गर्छ ।

सामान्य कारमा ब्रेक लगाउँदा निस्कने ऊर्जा खेर जान्छ, तर विद्युतीय वा हाइब्रिड कारमा यो ऊर्जा ब्याट्री चार्ज गर्न प्रयोग गर्न सकिन्छ ।

रिजेनेरेटिभ ब्रेकिङ सिस्टम आजकल धेरै आधुनिक कारहरुमा प्रदान गरिएको हुन्छ । पेट्रोल र डिजेल कारमा यसको सहयोगले विभिन्न इलेक्ट्रोनिक कम्पोनेन्टहरू चलाउने ब्याट्री चार्ज गर्न सकिन्छ । यसले कारमा इन्धन खपत कम गर्छ । यद्यपि, इलेक्ट्रिक र हाइब्रिड कारहरूमा रिजेनेरेटिभ ब्रेकिङको प्रयोग भने ब्याट्री चार्ज गर्नका लागि गरिन्छ ।

रिजेनेरेटिभ ब्रेकिङले कसरी गर्छ काम ?
विद्युतीय वा हाइब्रिड कारमा रहेको विद्युतीय मोटरले दुई किसिमले काम गर्छ – एउटा पांग्रा चलाउन र कारको गति बढाउन तथा अर्को ब्याट्री रिचार्ज गर्न । जब तपाईँले कारको एक्सेलेटरबाट आफ्नो खुट्टा निकालेर ब्रेक पेडललाई दबाउनुहुन्छ, रिजेनेरेटिभ ब्रेकिङ प्रणाली सक्रिय हुन्छ र ब्याट्री चार्ज गर्न थाल्छ । यसका लागि कारको मोटरमा रिजेनेरेटिभ ब्रेकिङ प्रणाली जडान गरिएको हुन्छ ।

यो प्रक्रिया शुरु भए पछि कारको गति पनि कम हुन्छ । कार कम्पनीहरुले विभिन्न तरिकाले यो सिस्टमलाई अलग अलग तरिकाले सेट गरेका हुन्छन् । रिजेनेरेसको तीव्रतालाई पनि प्रोग्रामको रुपमा सेट गर्न सकिन्छ ।

कारमा मात्र नभएर इलेक्ट्रिक स्कुटर र बाइकमा समेत यो प्रविधिको प्रयोग भएको हुन्छ ।