पूर्ण प्रतिबन्धको असर विद्युतीय सवारीमा नपर्ने : एलसी खोल्न पाइने

काठमाडौं – सरकारले आज राजपत्रमा सूचना प्रकाशित गरे अनुसार विभिन्न प्रकारका सवारी साधनहरुमा प्रतिबन्ध लगाइने छ । यस अनुसार पेट्रोलियम पदार्थबाट चल्ने सवारी साधनमा प्रतिबन्ध लाग्ने भए पनि विद्युतीय गाडीमा भने नलाग्ने भएको छ ।

उद्योग वाणिज्य तथा आपूर्ति मन्त्रालयले राजपत्रमा सूचना प्रकाशित गर्दै विलासी उपभोग्य सामानको आयातमा पूर्ण प्रतिबन्ध लगाएको हो ।

असार मसान्तसम्मका लागि भन्दै आयातमा रोक लगाइएका सामानहरुमा मोबाइल सेट, रंगीन टेलिभिजन (३२ इञ्चभन्दा माथिका), २५० सीसी भन्दा माथिल्लो क्षमताका मोटरसाइकल, जीप, कार र भ्यानहरु (एम्बुलेन्स र शववाहन प्रयोजनका लागि ल्याउन पाइने), सबै प्रकारका खेलौनाहरु रहेका छन् ।

यसअघि चैत अन्तिम सातादेखि राष्ट्र बैंकको मौखिक निर्देशनमा सबै प्रकारका सवारीसाधनको आयातका लागि एलसी खोल्न रोक लगाइएको थियो। जसका कारण सबैमा अन्यौलता छाएको थियो।