आगामी आइतबार देखि ‘सेफ ड्राइभ, सेभ लाइभ्स’ रेडियो कार्यक्रम सञ्चालन हुने

काठमाडौं – नेपालमा मोटर/मोटरसाइक्लिङ स्पोर्ट्स, अटोमोबाइल मोबिलिटी तथा ड्राइभ टुरिजम र सडक सुरक्षा क्षेत्रमा सक्रिय नेपाल अटोमोबाइल्स एसोसिएसन (नासा नेपाल) र रेडियो काठमाडौं बीच रेडियो कार्यक्रम ‘सेभ ड्राइभ, सेभ लाइभ्स’ प्रशारण गर्ने सम्झौता सम्पन्न भएको छ ।

रेडियो काठमाडौं ९२.१ मा प्रशारण हुने सो कार्यक्रम हरेक आइतबार साँझ साढे ६ बजे देखि आधा घण्टाको हुनेछ र आगामी आइतबारबाट ५२ हप्ता सम्म चल्नेछ । फेडरेसन इन्टरनेसनल डेल अटोमोबाइल (एफआईए) को सहयोगमा संचालन हुने उक्त कार्यक्रममा सवारी दुर्घटना र रोकथाम, सुरक्षित मोटरसाइकल राइडिङ्ग र सुरक्षित हेल्मेटको आवश्यकता, सार्वजनिक यातायात र अटोमोबाइलका राष्ट्रिय/अन्तर्राष्ट्रिय विषयमा प्रकाश पारिने छ ।

एक कार्यक्रमका बीच रेडियो काठमाडौंका बिजनेश हेड चन्द्रमणि गौतम र एफआईए वर्ल्ड काउन्सिल सदस्य (FIA World Council Member) गोविन्द भट्टराई बीच सो कार्यक्रम सम्बन्धी सम्झौतामा आदान प्रदान गरियो ।

कार्यक्रम रेडियो काठमाडौंका अलावा नासा नेपाल र रेडियो काठमाडौंका फेसबुक पेजबाट समेत सुन्न सकिनेछ ।