इलेक्ट्रिक भेइकल फ्लिट अपरेसनका लागि एकैपटक ५० इलेक्ट्रिक गाडीको अर्डर

काठमाडौं – बीवाईडीको नेपालका लागि आधिकारिक वितरक साइमेक्स इंक र स्पार्क ग्रुपको सहायक कम्पनी सेल्फ ड्राइभ नेपाल प्रालि बीच ५० युनिट इलेक्ट्रिक कार ई६ खरिद सम्बन्धी सम्झौता सम्पन्न भएको छ । यस अनुसार पहिलो चरणमा ५ युनिट इलेक्ट्रिक कार एक समारोहका बीच हस्तान्तरण गरिएको छ ।

बीवाईडी इलेक्ट्रिक भेइकलको रेन्टल पार्टनरको रुपमा सेल्फ ड्राइभले कार्य गर्नेछ । यसरी एकैपटक यति धेरै संख्यामा इलेक्ट्रिक गाडी अर्डर गरिएको यो दक्षिण एसियामै पहिलो उदाहरण भएको साइमेक्स इंकले बताएको छ ।

नेपालमा पनि आगामी दिनमा यसरी यति धेरै संख्यामा इलेक्ट्रिक कारलाई फ्लिट अपरेसनको लागि प्रयोग गरिने भएको छ र नयाँ उदाहरण हुनेछ । गाडी हस्तान्तरण समारोहमा साइमेक्स इंकका सीईओ साहिल श्रेष्ठले नेपालमा इलेक्ट्रिक सवारी प्रवद्र्धनका लागि आफूहरुले धेरै कार्य गरिरहेको बताउदै बीवाईडीका प्रदूषणमुक्त सवारी साधनमार्फत सुरक्षित, भरपर्दो र हरित यातायात सुविधा उपलब्ध गराउनका लागि सेल्फ ड्राइभलाई उपयुक्त देखेर सहकार्यको थालनी गरिएको बताए ।

सेल्फ ड्राइभका सीईओ रोशन पोखरेलले आरामदायिता, उपयुक्त रेन्ज र रेपिड चार्जिङका लागि बीवाईडी ई६ नै उपयुक्त भएको अनुभव गरेर दीर्घकालीन रुपमा सहकार्य गर्ने उद्देश्यका साथ कार्य प्रारम्भ गरिएको बताए ।

बीवाईडी र स्पार्क ग्रुपले आगामी दिनमा बीवाईडी ई६ मार्फत नेपालमा लक्जरी इलेक्ट्रिक भेइकल फ्लिट अपरेसन संचालन गर्नेछन् । यसबाट कर्पोरेट र प्राइभेट सबै प्रकारका ग्राहकले सुविधा पाउने विश्वास गरिएको छ । हाल ५ वटा कार हस्तान्तरण गरिएको छ र आगामी दिनमा अन्य कार समेत हस्तान्तरण गरिने बताइएको छ ।

नेपाली बजारमा पहिले देखि नै उपलब्ध बीवाईडी ई६ प्योर इलेक्ट्रिक फ्रन्ट ह्विल ड्राइभ युटिलिटी भेइकल तथा क्रसओभर एसयूभी हो । यसमा प्रशस्तै इन्टेरियर स्पेस छ भने ६ वटा एयरब्याग छन् । यो गाडीमा ९० किलोवाट इलेक्ट्रिक मोटर छ भने यसमा भएको ८० किलोवाट आवर लिथियम आइरन फस्फेट ब्याट्रीले सिंगल चार्जमा ४०० किलोमिटरको रेन्ज दिने कम्पनीको भनाइ छ ।

काठमाडौंको गुहेश्वरीमा रहेको स्पार्क ग्रुपको फ्यासिलिटीमा बीवाईडीको अत्याधुनिक सर्भिस सेन्टर समेत निर्माण गरिने बताइएको छ । आगामी मे महिनादेखि नै संचालनमा ल्याउने लक्ष्य राखिएको उक्त वर्कशपमार्फत ग्राहकले स्तरीय सर्भिस पाउने र बीवाईडीप्रति नेपाली ग्राहकले अझै राम्रो प्रतिक्रिया प्राप्त गर्न सफल हुने अपेक्षा गरिएको छ । यहाँ पहिले नै ४० किलोवाटको फास्ट चार्जर इन्स्टल भइसकेको छ ।

बीवाईडी ई६ ले सन् २०१६ मै चीनको बेस्ट सेलिङ प्योर इलेक्ट्रिक कार बन्न सफल भएको थियो भने सन् २०१५ मा हवाना इन्टरनेसनल फेयरमा ‘बेस्ट क्वालिटी प्रोडक्ट’ बन्न सफल भएको थियो । त्यसयता यसले विश्व स्तरका धेरै पुरस्कार पाइसकेको छ ।