विवाइडीले अब इलेक्ट्रिक र प्लग–इन हाइब्रिड कारमात्र उत्पादन गर्ने

चाइनिज अटो निर्माता विवाइडीले अब इलेक्ट्रिक र प्लग इन हाइब्रिड कार मात्र उत्पादन गर्ने भएको छ । अबदेखी ग्यासोलिन भेहिकलको उत्पादन नगर्ने उद्घोष गरेको सो कम्पनीले प्लग इन हाइब्रिड कारका लागी भने ग्यासोलिन इन्जिनको उत्पादनलाई निरन्तरता दिने जनाएको छ ।

पेट्रोल र डिजेलबाट चल्ने गाडीको उत्पादन बन्द गर्ने निर्णय लिएपनि यसअघि बजारमा उपलब्ध यस्ता गाडीका लागी आबश्यक पर्ने स्पेयर पार्टसको उत्पादनलाई भने निरन्तरता दिइने उसको भनाई छ । ‘यसअघि बजारमा बिक्री भएका गाडीको आफ्टर सेल्स सर्भिसमा भने कुनै समस्या आउन दिइने छैन । जसका लागी इन्धनबाट चल्ने सवारीसाधनको लाइफ साइकल रहुन्जेलसम्म यस्ता गाडीमा प्रयोग हुने स्पेयर पार्टस् र कम्पोनेन्टको सप्लाईलाई निरन्तरता दिइनेछ’ कम्पनीद्धारा जारी विज्ञप्तिमा भनिएको छ ।

सन् २०३० सम्ममा कार्वन इमिसनलाई उल्लेख्यमात्रामा कम गरिसक्ने चीन सरकारको योजना मुताविक विवाइडीले यस्तो निर्णय लिएको हो । यो कम्पनी चीनमा नयाँ–इनर्जी भेहिकल उत्पादनमा अग्रणी रहँदै आएको छ । विवाइडीका इलेक्ट्रिक कार नेपाली बजारमा समेत उपलब्ध रहँदै आइरहेका छन् । यो ब्रान्डलाई साइमेक्स इंक प्रालिले आयत गरी बिक्रीबितरण गरिरहेको छ ।