आफ्नै प्रयोजनका लागि वा भाडामा लगाउन इलेक्ट्रिक कार चार्जर

इलेक्ट्रिक कारको ब्याट्री चार्ज गर्नका लागि हाल विभिन्न विकल्प उपलब्ध छन् । नेपालमा हाल विभिन्न कम्पनीहरुका इलेक्ट्रिक कार उपलब्ध छन् । नेपाली बजारमा दीगो ब्रान्डमा इलेक्ट्रिक कार बिक्री–वितरण गरिरहेको दीगो ग्रुप अफ कम्पनिज अन्तर्गतको फ्युचर ग्रीन इनर्जी प्रालिले भने चार्जर समेत बिक्री–वितरण गरिरहेको छ ।

हाल भृकुटीमण्डपमा जारी हिमालयन हाइड्रो एक्सपोमा कम्पनीले चार्जर समेत बिक्रीका लागि उपलब्ध गराइरहेको छ । सो अवसरमा इलेक्ट्रिक कारको चार्जर वारेमा जानकारी समेत प्रदान गरिरहेको छ ।

कम्पनीले हाल जीभीटी स्ट्यान्डर्ड र सीसीएस स्ट्यान्डर्ड गरी दुई प्रकारका चार्जर उपलब्ध गराइरहेको फ्युचर ग्रीन इनर्जीकी सेल्स एन्ड मार्केटिङ अफिसर सुसन श्रेष्ठले बताइन् । जीभीटी स्ट्यान्डर्डको चार्जर चाहिं दीगोका कारहरुमा मात्र प्रयोग गर्न सकिन्छ भने सीसीएस स्ट्यान्डर्डको चार्जर एमजी, बीवाईडी, टाटा जस्ता बजारमा उपलब्ध अन्य ब्रान्डका कारमा समेत प्रयोग गर्न सकिन्छ । यी कारमा भएको पोर्ट फरक हुने भएकाले त्यही स्ट्यान्डर्ड अनुसारको चार्जर प्रयोग गर्नुपर्छ ।

कम्पनीले हाल पोर्टेबल, वाल माउन्ट र फिक्स गरी तीन प्रकारको चार्जर उपलब्ध गराइरहेको छ । पोर्टेबल चार्जरलाई गाडीमै राखेर विभिन्न स्थानमा लैजान र चार्ज गर्न सकिन्छ । वाल माउन्ट चार्जर घरको भित्तामा माउन्ट गरेर राख्न सकिन्छ भने फिक्स चार्जर चाहिं एकै स्थानमा फिक्स गरेर राख्न सकिन्छ । यसलाई व्यावसायिक कार्यमा लगाउन सकिन्छ ।

फास्ट चार्जरमा हाल जीभीटी स्ट्यान्डर्ड मात्र उपलब्ध भए पनि केही महिना भित्रै सीसीएस स्ट्यान्डर्ड समेत उपलब्ध हुने श्रेष्ठले बताइन् ।

हाल ७ किलोवाट क्षमताको पोर्टेबल र वाल माउन्ट चार्जर उपलब्ध छ । गाडीमा भएको ब्याट्री क्षमता अनुसार निश्चित समयमा ब्याट्रीलाई चार्ज गर्न सकिन्छ । यी चार्जरको मूल्य क्रमशः ७० हजार र १ लाख २० हजार रुपैयाँ तोकिएको छ ।

फास्ट चार्जर ६० किलोवाट क्षमताको छ । एक पटकमा दुईवटा गाडी चार्ज गर्न सकिन्छ । यसरी चार्ज गर्दा सामान्यतः ४५ मिनेटमा फुल चार्ज गर्न सकिन्छ । यसको मूल्य १८ लाख ७५ हजार रुपैयाँ तोकिएको छ । सबै चार्जरमा हाल एक्सपो अवधिका लागि ५ प्रतिशत छुटको समेत व्यवस्था छ ।