रेनो क्विडको २०२२ मोडल सार्बजनिक, नयाँ भेरियन्ट आरएक्सएल(ओ) भयो थप

फ्रेन्च अटो निर्माता रेनोले क्विडको २०२२ मोडललाई भारतीय बजारमा सार्बजनिक गरेको छ । इन्ट्रि लेभल ह्याचब्याकमा लोकप्रिय बनिरहेको क्विडलाई रेनोले सन् २०१५ मा पहिलोपटक लन्च गरेपछि सन् २०१९ मा फेसलिफ्ट मोडल ल्याएको थियो । हाल सार्बजनिक गरिएको नयाँ मोडलमा केहीमात्र कस्मेटिक अपडेट गरिएको छ । जसको सुरुवाती मूल्य ४ लाख ४९ हजार भारु निर्धारण गरिएको छ ।

रेनोले यो मोडलमा नयाँ भेरियन्ट समेत थप गरेको छ । यसअघि उपलब्ध नभएको आरएक्सएल(ओ) भेरियन्टलाई थप गरिएको र यो हाल कारोबार भैरहेको आरएक्सएल र आरएक्सटीको विचको भेरियन्ट भएको जनाइएको छ । यसको मूल्य ४ लाख ७४ हजार र ४ लाख ८४ हजार भारु निर्धारण गरिएको छ ।

८ सय र १ हजार सिसी सेग्मेन्टमा उलब्ध यो नयाँ मोडलमा रेनोले ड्रइभर साइड सिट बेल्ट प्रि–टेन्सर र लोड लिमिटरलाई थप गरेको छ । त्यसैगरी यसको क्लाइम्बर मोडलमा नयाँ डुअल टोन कलर अप्सन दिइएको छ । यो कारमा ८ इन्चको टचस्क्रिन, एप्पल कारप्ले र एन्ड्रोइड अटो कनेक्टिभिटी, भ्वाइस कमान्ड, एलइडी डिआरएल, इलेक्ट्रिकल्ली फोल्डिङ ओआरभिएमएस, रिभर्स पार्किङ क्यामेरा लगायत अन्य थुप्रै फिचर्स दिएको छ ।

डुअल एयरब्याग, एबिएस, इबिडी सिट बेल्ट रिमाइन्डर र रिभर्स पार्किङ जस्ता सेफ्टि फिचर्स दिइएको यो नयाँ मोडलको इन्जिन र पावरट्रेन भने पुरानैलाई कायम गरिएको छ ।

क्विड नेपाली बजारमा समेत निकै नै रुचाइएको इन्ट्रि लेभल ह्याचब्याक कार हो । नेपाली बजारमा यसको १ हजार सिसी सेग्मेन्ट मात्र उपलब्ध रहँदै आएको छ । जसको मूल्य २५ लाख ४९ हजारदेखी २७ लाख रुपैयाँसम्म निर्धारण गरिएको छ ।