होन्डा एक्टिभा अब इलेक्ट्रिक अवतारमा आउँदै, चाँडै लन्च हुने सम्भावना

इलेक्ट्रिक बाइकको निर्माण द्रुत गतिमा बढ्दै गइरहेको छ । हिरो मोटोकर्प, सुजुकी, यामाहा, केटीएम र हस्कभर्ना जस्ता कम्पनीले आगामी केही वर्षमा इलेक्ट्रिक बाइक ल्याउने सम्भावना छ । होन्डा मोटरसाइकल एण्ड स्कुटर इन्डिया पनि यही बाटोमा अगाडि बढिरहेको छ । होन्डा मोटरसाइकल इन्डियाले आफ्नो पहिलो ईभी भारतमा लन्च गर्ने तयारी गरिरहेको छ ।

कम्पनीले होन्डा एक्टिभा नेमप्लेट प्रयोग गर्ने अनुमान गरिएको छ । होन्डा मोटरसाइकल इन्डियाका अध्यक्ष अत्सुशी ओगाटाले कम्पनीले आगामी आर्थिक वर्षसम्ममा भारतका लागि आफ्नो पहिलो ईभी तयार हुने पुष्टि गरेका छन् । कम्पनीले भारतको लागि पूर्ण रूपमा नयाँ उत्पादन विकास गर्ने वा हाल अन्तर्राष्ट्रिय बजारहरूमा उपलब्ध इलेक्ट्रिक टु ह्विलरमध्ये एकको संशोधित संस्करण प्रयोग गर्नेछ ।

भारतमा हाल एक मात्र होन्डा इलेक्ट्रिक टु–ह्विलर उत्पादन होन्डा बेन्ली ई–स्कुटर हो । यो भारतको अटोमोटिभ रिसर्च एसोसिएसनमा परीक्षणको क्रममा देखिएको थियो ।

कम्पनीले घरेलु बजार जापानमा बेन्ली ईःआई, बेन्ली ईःआई प्रो, बेन्ली ईःआईआई र बेन्ली ईःआईआई प्रो सहित विभिन्न मोडलहरू उपलब्ध गराएको छ । कम्पनीसँग पीसीएक्स इलेक्ट्रिक, जाइरो ईः र जाइरो क्यानोपी ईः जस्ता अन्य इलेक्ट्रिक टु–ह्विलर सवारी साधनहरू पनि छन् ।

होन्डा बेन्ली ई पहिले देखि नै उपलब्ध छ । यसलाई होन्डा एक्टिभा इलेक्ट्रिक स्कुटरको आधारको रूपमा प्रयोग गर्न सकिने प्रबल सम्भावना छ । होन्डा एक्टिभा इलेक्ट्रिक स्कुटरलाई बदल्न मिल्ने ब्याट्रीको साथमा प्रयोग गरिने सम्भावना छ ।