नेपालमा उपलब्ध छ ७८ लाख ५० हजारदेखी २ करोड २० लाख रुपैयाँसम्म पर्ने मित्सुबिसीको एसयुभी

जापनिज अटो मेकर मित्सुबिसीले नेपालमा ५ वटा मोडलका गाडी बिक्री गर्दै आइरहेको छ । उसले बिक्री गर्ने यी मोडलमा एउटा पिकअप र अन्य ४ वटा एसयुभी रहेको छ । जसमध्ये पजेरो आम नेपालीले सुन्दै आएको नाम हो । अहिले पनि महंगो र बिलासी गाडीको नाम लिनुपर्दा पजेरो अग्रपंक्तिमा आउँछ । पजेरोलाई नेताहरुको बिलासी जीवनसंग दाँजेर हेर्ने समेत गरिन्छ ।

जापनको छैटो ठूलो उत्पादक यो कम्पनी बलियो र सुबिधासम्पन्न गाडी उत्पादनका कारण विश्वभर चर्चामा रहँदै आएको छ । नेपालका लागी आधिकारिक बिक्रेताका रुपमा लिओन मोटर्सले सन् २००८ देखी यो ब्रान्डलाई नेपाल भित्राएर कारोबार गरिरहेको छ ।

बजारमा अहिले यसको पजेरो सहित एक्लिप्स, आउटल्यान्डर, एक्सपान्डर एसयुभी र एल२०० पिकअपको कारोबार भैरहेको छ । जसमध्ये पजेरो ५ डोर, ३ डोर र स्पोर्ट गरी भिन्न ३ भेरियन्टमा उपलब्ध छ । ३२ सय सिसी क्षमताको पजेरो ५ डोरको मूल्य २ करोड २० लाख र ३ डोरको १ करोड ७२ लाख रुपैयाँ निर्धारण गरिएको छ । यी दुबै एसयुभी ४ ह्विल ड्राइभका हुन् । अर्को भेरियन्ट पजेरो स्पोर्ट जिएलएसमा भने २४ सय सिसीको डिजेल इन्जिन दिइएको छ । यसको मूल्य १ करोड ८५ लाख रुपैयाँ पर्छ ।

पजेरोपछिको दोस्रो महंगो मोडल आउटल्यान्डरको मूल्य १ करोड ५५ लाख रुपैयाँ तोकिएको छ । २४ सय सिसी क्षमताको यो एसयुभी प्लग इन हाइब्रिड सेग्मेन्टको हो । यो एसयुभीमा समेत ४ ह्विल ड्राइभ दिइएको छ । पछिल्लो सयम आउटल्यान्डरले मित्सुबिसीको नेपालमा सर्बाधिक बिक्री हुने मोडलका रुपमा आफूलाई स्थापित गराइरहेको छ ।

त्यसैगरी दुई भेरियन्टमा उपलब्ध १५ सय सिसी क्षमताका एक्लिप्स क्रसको मूल्य १ करोड १९ लाख ५० हजार र १ करोड २२ लाख रुपैयाँ निर्धारण गरिएको छ । यो एसयुभीमा सिभिटी ट्रान्समिसन दिइएको छ ।

यसको सबैभन्दा सस्तो मोडल भने एक्सपान्डर मोडल हो । १५ सय सिसी क्षमताको यो गाडीको मूल्य ७८ लाख ५० हजार रुपैयाँ निर्धारण गरिएको छ । अटोमेटिक ट्रान्समिसन दिइएको यो एसयुभी भने २ ह्विल ड्राइभमा उपलब्ध रहँदै आएको छ ।

यसको एल २०० पिकअप ६ स्पिड म्यानुअल र ५ स्पिड अटोमेटिक ट्रान्समिसनमा उपलब्ध छ । जसको मूल्य क्रमश ९७ लाख र १ करोड २ लाख रुपैयाँ पर्छ । प्रिमियम पिकअप सेग्मेन्टमा लोकप्रिय बनिरहेको यो पिकअपमा २४ सय सिसी क्षमताको इन्जिन जडान गरिएको छ । जुन ४ ह्विल ड्राइभमा उपलब्ध छ ।