आवश्यक तालिम र अन्य व्यवस्थापन पश्चात मात्र युरो ६ लागू गर्नु पर्ने अटो मेकानिक्स व्यवसायी संघको माग

काठमाडौं – नेपालमा युरो ६ सरहको नेपाल सवारी प्रदूषण मापदण्ड लागू गर्ने तयारी भइरहेको सन्दर्भमा यसलाई आवश्यक तयारीका साथ मात्र लागू गर्नु पर्ने कुरामा नेपाल अटो मेकानिक्स व्यवसायी संघ समेत रहेको छ ।

संघका अध्यक्ष ठाकुरप्रसाद न्यौपानेले आवश्यक तयारी गरेर र त्यस्ता सवारी साधनका लागि आवश्यक मर्मत सम्भार गर्न सकिने व्यवस्था गरेर मात्र सो मापदण्ड लागू गरिनु पर्ने बताए ।

यसका लागि गत असार महिनामै संघले वन तथा वातावरण मन्त्रालय अन्तर्गतको वातावरण विभागसँग छलफल सम्पन्न गरेको थियो । विभागले पहिले गत साउन ०१ गते देखि लागू हुने गरि ठूला सवारी साधनको हकमा बीएस४ तथा साना सवारी साधनको हकमा बीएस६ अनुसार प्रदूषण मापदण्ड लागू गर्ने तयारी गरेको थियो । भारतमा बीएस६ लागू भइसकेको सन्दर्भमा नेपाल भित्रिने कार तथा मोटरसाइकलमा बीएस६ वा युरो ६ सरहको नेपाल सवारी प्रदूषण मापदण्ड लागू गर्ने वारेमा छलफल भइरहेको छ । यो भन्दा पहिले नाडा अटोमोबाइल्स एसोसिएसन अफ नेपालले पनि आवश्यक तयारीका साथ मात्र अगाडि बढ्न सरकारलाई आग्रह गरिसकेको छ ।

संघले मापदण्ड लागू गर्नु पूर्व उक्त सवारी साधनको मर्मत सम्भारको लागि अटो मेकानिक्सहरुलाई प्रविधिक तालिमको व्यवस्था गर्नु पर्ने, वर्कशप स्तरोन्नत्तिको लागि अत्याधुनिक यन्त्र उपकरण आयातमा भन्सार छुटको व्यवस्था गर्नुका साथै सहुलियत दरमा ऋण उपलब्ध गराउनु पर्ने र अटोल्यान्डको व्यवस्था गर्न सरोकार वाला पक्षसँग पनि सहजिकरणको भूमिका खेलिदिन अनुरोध गरेको छ ।

सरकारले विक्रम सम्बत २०६९ सालमा लागू गरेको नेपाल प्रदूषण मापदण्ड ३ बाट उक्लेर एकै पटक नेपाल प्रदूषण मापदण्ड ६ लागू गर्ने तयारी गरेको छ । यसअघि विक्रम संम्बत २०७६ सालमा प्रदूषण मापदण्ड ४ तयार गरेपनि लागू नगरी बसेको सरकारले मापदण्ड ६ लागू गर्ने तयारी गरेको छ ।