फरक फिचर र नयाँ अनुभव दिने हुन्डाईको इलेक्ट्रिक कार आयोनिक ५ नेपालमा लन्च हुँदै

नेपाली बजारमा हुन्डाईको नयाँ इलेक्ट्रिक कार आयोनिक ५ भित्रिएको छ । नेपालका लागि हुन्डाईको आधिकारिक वितरक लक्ष्मी इन्टरकन्टिनेन्टल प्रालिले केही समयमै यसको औपचारिक लन्च गरिने बताएको छ ।

अन्तर्राष्ट्रिय रुपमा समेत चर्चा पाइसकेको हुन्डाई आयोनिक ५ सबैभन्दा बढी सजावटयुक्त र प्रिमियम इलेक्ट्रिक कार मान्न सकिन्छ । यो निकै नै स्टाइलिस र फ्युचरिस्टिक मोडलमा उपलब्ध छ, जसमा भएको प्यारामेट्रिक पिक्सेल हेडल्याम्प, क्लमसेल हुड, एक्टिभ एयर इन्टेक र पिक्सेल टेललाइटले धेरैको आँखा लोभ्याउछ ।

हुन्डाईको नयाँ इलेक्ट्रिक ग्लोबल मोड्युलर प्लेटफर्म अर्थात ई–जीएमपीमा बनेको यो पहिलो कार हो । उक्त प्लेटफर्ममार्फत ब्याट्री इलेक्ट्रिक भेइकललाई फास्ट चार्जिङ गर्न, ड्राइभिङ रेन्ज बढाउन, इन्टेरियर स्पेस बढाउन र बेटर ह्यान्डलिङमा सहयोग प्राप्त हुन्छ । यसका कारण नै आयोनिक ५ को डिजाइन मात्र आकर्षक छैन, यसको इन्टेरियर नै लोभलाग्दो छ भने चार्जिङ र अन्य सुविधा समेत फरक छ ।

यसमा भएको ११८ इन्चको ह्विलबेसका कारण यो अन्य एसयूभी भन्दा लामो छ । यसको इन्टेरियरमा पनि वातावरणमैत्री मेटरियलको प्रयोग गरिएको छ ।

नेपाली बजारमा उपलब्ध हुने आयोनिक ५ मा ५८ किलोवाट क्षमताको ब्याट्री जडान गरिएको र यसले ३६५ किलोमिटर सम्मको रेन्ज दिने दाबी गरिएको छ ।

यसमा वायरलेस चार्जिङ, फरक खालको स्टेयरिङ ह्विल, आकर्षक इन्फोटेनमेन्ट सिस्टम र डिजिटल इन्स्ट्रयुमेन्ट क्लस्टर, सोलार चार्जर, ३६० डिग्री क्यामेरा आदि विभिन्न फिचर पाउन सकिन्छ ।

आयोनिक ५ सोलार रुफ र भिजन रुफ गरी दुई भेरिएन्टमा उपलब्ध हुनेछ । सोलार रुफ चाहिं गाडीलाई १०० किलोमिटर गुडाउदा ५ देखि ७ प्रतिशत सम्म सोलार पावरले आफै रिचार्ज हुने कन्सेप्टमा बनाइएको हो । त्यसैगरी भिजन रुफ चाहि अपिल र भर्सेटालिटीमार्फत पावर रोलर ब्लाइन्ड बढाउने कन्सेप्टमा आधारित छ ।

यो कार विभिन्न ११ कलरमा उपलब्ध हुनेछ ।