सुजुकी इको भ्यान, परिवार र व्यवसाय दुबैलाई उपयुक्त साधन

कार्यलयमा काम गर्ने कर्मचारीदेखी स्कुले बिद्यार्थीलाई सटल सर्भिस प्रदान गर्न उपयुक्त सवारी बनेको सुजुकी इको भ्यान धेरै सदस्य भएको परिवारका लागि पारिवारिक वाहन समेत बनिरहेको छ । नेपालमा यो सवारीसाधन बिशेषगरी कार्यलय प्रयोजनमा बढी प्रयोग हुने गरेको छ ।

प्यासेन्जर भ्यानमा एकछत्र बजार लिन सफल इको ५ र ७ सिट अप्सनमा उपलब्ध रहँदै आएको छ । १२ सय सिसी क्षमताको इन्जित जडित यसको अधिकतम पावर ५४ किलोवाट र टर्क ९८ एनएम रहेको छ । यो बिएस६ स्टान्डर्डमा उपलब्ध रहँदै आएको छ । प्रतिलिटर इन्धन खपतमा ११ किलोमिटर माइलेज प्रदान गर्ने दाबी गरिएको यो भ्यानको ग्राउन्ड क्लिरियन्स १६० एमएम र ह्विबेश २३५० एमएम रहेको छ ।

अगाडीको चक्कामा डिस्क र पछाडी ड्रम ब्रेक दिइएको यो भ्यानको कुल तौल ९४० किलोग्राम रहेको छ । ४० लिटर इन्धन अट्ने ट्यांक उपलब्ध भएको इकोमा ड्राइभर एयरब्याग, एबिएस, इबिडी, रिभर्स पार्किङ सेन्सर, सिट बेल्ट रिमाइन्डर जस्ता सेफ्टि फिचर्स दिइएको छ । यो भ्यानको मूल्य नेपाली बजारमा ५ सिटर एसीको २७ लाख २९ हजार र ७ सिटर स्टान्डर्डको २६ लाख ७४ हजार रुपैयाँ निर्धारण गरिएको छ ।