२०३० सम्ममा सम्पूर्ण रेन्जलाई इलेक्ट्रिफाई गरिसक्ने रोल्स रोयसको उद्घोष

बिलासी कार उत्पादक रोल्स रोयसले सन् २०३० सम्ममा आफ्ना सम्पूर्ण रेन्जलाई इलेक्ट्रिक भर्सनमा कन्भर्ट गरिसक्ने उद्घोष गरेको छ । जस अन्तर्गत उसले पहिलो चरणमा सन् २०२३ भित्रै हाल कारोबार भैरहेको रेइथ मोडललाई बिस्थापन गर्दै नयाँ इभी स्पेक्ट्र कुपे लन्च गर्ने जनाइएको छ । त्यसपछि चरणबद्ध रुपमा कुलियन एसयुभी, गोस्ट सेडान र फेन्टम लिमुजिनलाइ समेत इलेक्ट्रि भर्सनमा उतार्ने योजना कम्पनीले बनाएको हो ।

अटो कार युकेसंगको कुराकानीमा कम्पनीका सिइओ टोर्सटन मुलरले उक्त समयसिमा भित्र सम्पूर्ण मोडलालाई इभीले प्रतिस्थापन गर्ने बताएका हुन् । उनका अनुसार हाल कारोबार भैरहेका रेन्जलाई समेत परिमार्जन गर्ने क्रमममा कम्वस्टन इन्जिनको प्रयोगलाई निस्तेज पारिनेछ ।

उनले भनेका छन, ‘सन् २०३० पछि कम्बस्टन इन्जिनयुक्त कारको बिक्रीमा प्रतिबन्ध लगाउने बेलायत सरकारको निणर्य अनुसार हामीले पनि इभीको उत्पादनलाई तत्कालैदेखी बढावा दिनुपर्ने दबाव सिर्जना भएको छ । जसअनुसार अबउप्रान्त कुनै पनि नयाँ मोडललाई कम्वस्टन इन्जिनमा उत्पादन नगर्ने र हाल कारोबार भैरहेका रेन्जलाई समेत बिस्तारै इलेक्ट्रिफाई गर्दै जाने योजना बनाएका छौ ।’

विश्वभरका अटो पारखीको ध्यान इलेक्ट्रिक कारमा बढ्दै गएका कारण लक्जरी सेग्मेन्टमा रोल्स रोयसको बजार समेत टेस्ला र बिएमडब्ल्यू लगायत अन्य ब्रान्डले खोस्न सक्ने जोखिम बढेको भन्दै कम्पनीले यस्तो निर्णय लिएको हो ।

कोभिड महामारीका बावजुत पनि रोल्स रोयसले ११७ बर्षको इतिहासमा सन् २०२१ मा सबैभन्दा बढी कार बिक्री गरेको थियो । सोही सन्दर्भमा अटो कार युकेले सिइओ टोर्सटन मुलरसंग बिशेष बार्ता गरेको थियो ।