एमजी मोटर इन्डियाले गर्दैछ २ इलेक्ट्रिक एसयूभी लन्च गर्ने तयारी

एमजी मोटर इन्डियाले गत वर्ष फेस्टिभ सिजनमा आफ्नो मिड साइज एसयूभी एस्टर लन्च गरेको थियो । सो एसयूभी निकै लोकप्रिय रहयो । कम्पनीले एस्टर एसयूभीको बढ्दो मागलाई पूरा गर्न उत्पादन बढाउने योजना बनाएको छ ।

कम्पनीले आर्थिक वर्ष २०२२–२३ को अन्त्य अघि नयाँ मोडल ल्याएर आफ्नो इलेक्ट्रिक सवारी साधनको पोर्टफोलियो विस्तार गर्ने योजना बनाएको छ । कम्पनीले आफ्नो लोकप्रिय जेडएस इलेक्ट्रिकलाई पनि अपडेट गर्नेछ ।

रिपोर्टका अनुसार एमजीले फेब्रुअरीमा अपडेट जेडएस ईभी पेश गर्नेछ । नयाँ मोडलको एक्सटेरियर र इन्टेरियरमा महत्वपूर्ण परिवर्तन गर्नेछ । नयाँ मोडलमा नयाँ ५१ केडब्ल्युएच ब्याट्री प्याक पाउने सम्भावना छ, जसले एक पटक चार्जमा ४८० किलोमिटरको रेन्ज दिन सक्षम हुनेछ ।

हाल उपलब्ध जेडएस ईभीमा ४४.५ केडब्ल्युएच क्षमताको ब्याट्री प्याक प्रदान गरिएको छ, जसको अनुमानित दायरा ४१९ किलोमिटर छ । नयाँ मोडलमा नयाँ फ्रन्ट फेसिया, अपडेटेड लाइटिङ सिस्टम र नयाँ बम्परसहितको नयाँ क्लोज्ड ग्रिल समावेश गर्नेछ । कारमा १०.१ इन्चको टचस्क्रिन इन्फोटेनमेन्ट सिस्टम, डिजिटल इन्स्ट्रयुमेन्ट कन्सोल, वायरलेस फोन चार्जर, एस्टरमा जस्तै एआई असिस्टेन्ट र एडीएएस सिस्टम समावेश गर्नेछ ।

एमजी मोटर इन्डियाले पनि सन् २०२२/२३ मा इलेक्ट्रिक भेइकल लन्च गर्ने आधिकारिक घोषणा गरेको छ, जसको मूल्य १० लाखदेखि १५ लाख भारु बीच हुनेछ । यो अल इलेक्ट्रिक क्रसओभर वैश्विक प्लेटफर्ममा आधारित हुनेछ जुन भारतीय बजारको लागि मोडिफाई गर्नेछ ।

सो एसयूभी सब–४ मिटर क्रसओभर हुने र सिंगल चार्जमा ३०० किलोमिटरको रेन्ज दिने दाबी गरिएको छ । यसले भारतमा टाटा नेक्सन ईभीसँग प्रतिस्पर्धा गर्ने अपेक्षा गरिएको छ ।