सन् २०२१ : सबैभन्दा मूल्यवान कम्पनी टोयोटा र तीव्र गतिमा बढिरहेको कार ब्रान्ड बन्यो बीवाईडी

सन् २०२१ को अटोमोबाइल ब्रान्ड सम्बन्धी नयाँ तथ्य सार्वजनिक भएको छ । यो वर्ष सबैभन्दा मूल्यवान अर्थात मोस्ट भ्यालुएबल कम्पनी टोयोटा बनेको छ । त्यसैगरी फास्टेस्ट ग्रोइङ कार ब्रान्ड अर्थात तीव्र गतिमा बढिरहेको कार ब्रान्ड बन्न चाइनिज कम्पनी बीवाईडी सफल भएको छ ।

ब्रान्ड सम्बन्धी जानकारी सार्वजनिक गर्ने ‘ब्रान्ड फाइनान्स’ ले प्रकाशित गरेको रिपोर्ट अनुसार बीवाईडीले सन् २०२१ मा २०२० को तुलनामा यसको मूल्यलाई दोब्बर बनाएको छ । अघिल्लो वर्ष यसको मूल्य ३.२ बिलियन डलर रहेकोमा २०२१ यो ६.४ बिलियन पुग्यो र ५०० मोस्ट प्रिसियस वान्स ब्रान्ड मध्ये ३४६औं स्थानमा रहन सफल भयो । बीवाईडीले पछिल्लो समयमा ल्याएको ब्लेड ब्याट्री प्रविधि र ई–प्लेटफर्म ३.० मा आधारित उत्पादनका कारण आगामी वर्ष झन् यसको स्तर अझै बढ्ने अपेक्षा गरिएको छ ।

बीवाईडीलाई टक्कर दिने एक मात्र अटोमोटिभ ब्रान्डमा चीनकै ग्रेटवाल मोटर्सको एक डिभिजन ह्यावल रहन पुगेको छ । ह्यावलले पनि अघिल्लो वर्षको तुलनामा ५५ प्रतिशत मूल्य बढाएको छ र यसको मूल्य ६.१ बिलियन पुगेको छ । यो ३७२औ स्थानमा रहन पुगेको छ ।

बीवाईडी र ह्यावल दुवै चाइनिज कम्पनी हुन् । बीवाईडीले विद्युतीय सवारी साधन उत्पादन गर्छ भने ह्यावलले पेट्रोलियम सवारी साधन । नेपाली बजारमा यी दुवै ब्रान्ड उपलब्ध छन् । बीवाईडीका इलेक्ट्रिक कार उपलब्ध छन् भने ह्यावल यही वर्ष मात्र नेपाली बजारमा भित्रिएको छ ।

कार ब्रान्डको कुरा गर्दा सबैभन्दा मूल्यवान कम्पनी टोयोटा पछि मर्सिडिज–बेन्ज, टेस्ला, फक्सवागन, बीएमडब्ल्यु, पोस्र्चे, होन्डा, फोर्ड, टाटा र निसान रहेका छन् ।