नेपाली बजारमा अब अर्को हाइब्रिड एसयूभी : भित्रियो १ करोड ७० लाख मूल्यको किया सोरेन्टो हाइब्रिड

काठमाडौं – किया मोटर्सले नेपाली बजारमा अल–न्यु किया सोरेन्टो हाइब्रिड कार भित्र्याएको छ । कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले १ करोड ६९ लाख ९० हजार रुपैयाँ मूल्य सहित सो हाइब्रिड कार नेपाली बजारमा उपलब्ध गराएको हो ।

हाइब्रिड भएकाले यो कार ब्याट्री र पेट्रोल इन्जिन दुवैले चलाउन सकिन्छ । यसमा १.६ लिटर टीजीडीआई टर्बो पेट्रोल इन्जिन र १.४९ किलोवाट आवरको ब्याट्री छ, जसलाई ४४.२ किलोवाट इलेक्ट्रोम्याग्नेटिक मोटरसँग जोडिएको छ । यसले २२७ एचपी पावर र ३५० एनएम टर्क जेनेरेट गर्छ ।

सोरेन्टो हाइब्रिड नर्मल, स्पोर्ट, इको, स्मार्ट, स्यान्ड, मड र स्नो गरी विभिन्न ड्राइभ मोडमा चलाउन सकिन्छ । सेफ्टी फिचरको रुपमा यसमा ७ एयरब्याग, लेन–किपिङ सिस्टम, इलेक्ट्रोनिक स्टेबिलिटी कन्ट्रोल, स्मार्ट क्रुज कन्ट्रोल, सराउन्ड भ्यु मोनिटर र विभिन्न फिचर छन् ।

अन्य एसयूभी जस्तै किया सोरेन्टो हाइब्रिड पनि ठूलो र बल्की बडी साइज छ । यसमा १९ इन्चको अलोय ह्विल, ड्युअल एलईडी प्रोजेक्टर हेडल्याम्प, फुल प्यानोरामिक सनरुफ र सार्पर बडी लाइन छ । अघिल्लो भागमा वाइड–स्विपङ ग्रिल छ, जुन एलईडी लाइटसँग एकीकृत भएको छ ।

अन्य फिचरहरुमा १२.३ इन्चको अल डिजिटल इन्स्ट्रयुमेन्ट क्लस्टर, ब्लाइन्ड स्पट मोनिटरिङ सिस्टम, हेडअप डिस्प्ले, भेन्टिलेटेड सिट, इन्टेरियर र्याप गरिएको नाप्पा लेदर आदि छन् ।

किया सोरेन्टो हाइब्रिड एसयूभी विभिन्न पाँच कलर अप्सनमा उपलब्ध हुने बताइएको छ । नेपाली बजारमा यो भन्दा पहिले सुजुकी र टोयोटाले हाइब्रिड एसयूभी भित्र्याएका थिए ।