चाबहिल चोक र मित्रपार्कमा आकाशे पुल बन्ने, मेयर शाक्यले गरे शिलान्यास

काठमाडौं – काठमाडौंको चाबहिल चोक र मित्रपार्कमा आकाशे पुलको शिलान्यास गरिएको छ ।

आइतबार काठमाडौं महानगरपालिकाका मेयर विद्यासुन्दर शाक्यले काठमाडौंको चाबहिल चोक र मित्रपार्कमा आकाशे पुलको शिलान्यास गरेका हुन् । पुल शिलान्यास गर्दै मेयर शाक्यले आकाशे पुल निर्माणपछि ट्राफिक जामको समस्या कम हुने बताए । उनले स्थानीयहरुको मागअनुसार पुल शिलान्यास गरिएको र स्थानीयको साथ रहेमा समय अगावै निर्माण कार्य सम्पन्न हुने बताउनु भयो ।
मेयर शाक्यले यो क्षेत्रमा धेरै ट्राफिक जाम हुने भएकाले स्थानीयको माग अनुसार यो स्थानमा पनि पुल बनाउन लागेको बताए । यो भन्दा पहिले चाबहिल चोकको दक्षिणपट्टि पुल बनिसकेको र मित्रपार्कमा पनि शिलान्यास भइसकेको छ । जयबागेश्वरीमा पनि शुरु भइसकेको छ ।

यो क्षेत्रमा नै ४ वटा पुल भइसकेपछि सडक दुर्घटना पनि कम हुने र पैदल यात्रीलाई धेरै सहज हुने उनको अनुमान छ ।

पुल निर्माणको ठेक्का सविरा कन्स्ट्रक्सनले पाएको छ भने २०७९ जेठ मसान्तसम्म पुल निर्माण सकिसक्नु पर्नेछ । दुवै पुल ३३ मिटर लम्बाई र २ मिटर चौडाईको हुनेछ ।