यसरी गर्न सकिन्छ हिरो स्प्लेन्डरलाई १५१ किमी रेन्ज दिने इलेक्ट्रिकमा रुपान्तरण

ईभी स्टार्टअप कम्पनी गोगोएवनले भारतमा दुई पाङ्ग्रे सवारीका लागि पहिलो आरटीओ स्वीकृत ईभी कन्भर्सन किट लन्च गरेको छ । उक्त कम्पनीले १० वर्ष पुरानो हिरो स्प्लेन्डर मोटरसाइकललाई इलेक्ट्रिक सवारी साधनमा रूपान्तरण गरेको छ ।

गोगोएवन कम्पनीले लन्च गरेको इलेक्ट्रिक कन्भर्सन किटको मूल्य लगभग ३५ हजार भारु तोकिएको छ । कम्पनीले सो किट हिरो स्प्लेन्डरमा जडान गरेको छ । कम्पनीले यो किट मार्फत हिरो स्प्लेन्डर एक पटक चार्जमा १५१ किलोमिटरसम्मको रेन्ज दिन सक्ने दाबी गरेको छ ।

कम्पनीले यो इलेक्ट्रिक किटमा ३ वर्षको वारेन्टी दिएको छ, तर ब्याट्री प्याकमा यो उपलब्ध छैन । यसमा १५१ किलोमिटरको ब्याट्री रेन्जको लागि किट र ब्याट्रीको मूल्य लगभग ९५ हजार भारु रहेको छ । सो मूल्यमा बाइकको मूल्य समावेश गरेको छैन ।

स्प्लेन्डरलाई ईभीमा रूपान्तरण गर्नका लागि कम्पनीको आधिकारिक वेबसाइट मार्फत अनलाइन अर्डर गर्न सकिन्छ । सो किट स्प्लेन्डरमा जडान गर्नको लागि गोगोएवन कम्पनीको केन्द्रमा गएर फिट गर्न सकिन्छ । हाल, भारतको ३६ आरटीओमा गोगोएवनको स्थानीय इन्टलेसन सेटअप उपलब्ध छ, र कम्पनीले चाँडै अन्य शहरमा पनि विस्तार गर्ने अपेक्षा गरिएको छ ।