नेक्सन इभीको लोकप्रियता पछि अब नेपाली बजारमा टाटा टिगोर इभी आउने

टाटा गाडीको नेपालका लागि आधिकारिक बितरक सिप्रद्धी ट्रेडिङले नयाँ इभी टिगोर नेपाल ल्याउने बताएको छ । हाल कारोबार भैरहेको टाटा नेक्सन इभीमा समेत उपलब्ध जिपट्रेन प्रबिधीमा आधारित भई निर्माण गरिएको यो कम्प्याक्ट सेडानलाई छिट्टै नेपाल भित्राउने कम्पनीले बताएको हो ।

२६ किलोवाटको लिक्विड–कुल्ड ब्याट्री प्याक जडान गरिएको यो कारलाई जुनकुनै मौसममा सहजै चलाउन सकिने बताइएको छ । यसमा जडान गरिएको विद्युतीय मोटरले ७४ बिएचपी (५५ किलोवाट) पावर र १७० एनएम टर्क जेनेरेट गर्छ ।

यसमा दिइएको ब्याट्रीलाई २५ किलोवाटको डिसी चार्जरबाट ६५ मिनेटमा ८० प्रतिशत चार्ज गर्न सकिन्छ । त्यसैगरी १५ एएमपी प्लगबाट समेत चार्ज गर्न सकिने हुँदा ग्राहकले आफ्नो घर वा कार्यलयमा हुने चार्जिङ पोर्टबाट सजिलै चार्ज गर्न सक्नेछन । यसरी चार्ज गर्दा भने ८ घण्टा ४५ मिनेटमा ८० प्रतिशतसम्म चार्ज गर्न सकिन्छ । यो नयाँ कारलाई ड्राइभ र स्पोर्ट गरी दुई मोडमा चलाउन सकिन्छ ।

नेपाली बजारमा यो इलेक्ट्रिक कार डेटोन ग्रे र टिल ब्लू गरी दुई कलर अप्सनमा उपलब्ध हुनेछ । यसको डुअल–टोन भेरियन्टमा भने माथिल्लो भाग कालो रंगको हुनेछ । ग्रिलमुनी कोरिएको निलो रंगका कारण यसलाई परैबाट सजिलै इलेक्ट्रिक कार भनेर छुट्टाउन सकिनेछ । ।यसमा दिइएको डिआरएल लाइटले कारलाई आकर्षक बनाएको छ । त्यसैगरी आकर्ष ह्विल र फोल्डेबल रियर भ्यू मिरर दिइएको छ । यो कारमा ३१६ लिटरको बुट स्पेस दिइएको छ ।

टिगोरको ड्यासबोर्डलाई फिक्का ग्रे र कालो थिम सहित डुअल–टोन कलरमा समायोजन गरिएको छ । यो कारमा ७ इन्चको हर्मन इन्फोटेनमेन्ट टचस्क्रिन, अटोमेटिक क्लाइमेट कन्ट्रोल, डिजिटल एलसिडी इन्सट्रुमेन्ट क्लस्टर, अटो एसी, एडजस्ट गर्न मिल्ने ड्राइभर सिटलगायतका विशेषताहरू दिइएको छ । त्यस्तै, स्मार्ट की पुस–बटन स्टार्ट र पोर्टेबल चार्जिङ केबल पनि उपलब्ध गराइएको छ । यसको अतिरिक्त चालक र यात्रु सहजताको लागि रिमोट कमान्ड र रिमोट डाइगोनिस्टिक सहित ३० भन्दा बढी अन्य कनेक्टिभिटी फिचर्स उपलब्ध गराइएको छ ।

डुअल एयर ब्याग, इबिडीसहितको एबिएस प्रविधि, रिअर पार्किङ सेन्सर, रिअर पार्किङ क्यामेरा, सिट बेल्ट रिमाइन्डर जस्ता विशेषताले यो कारलाई सुरक्षित बनाएको दाबी गरिएको छ । कम्पनीले यसको ब्याट्री र मोटरमा ८ वर्ष अर्थात् १ लाख ६० हजार किलोमिटरको वारेन्टी दिएको छ ।

भारतीय बजारमा यो इलेक्ट्रिक कारको सुरुवाती मूल्य ११ लाख ९९ हजार भारु तोकिएको छ । यो एक्सएम, एक्सजेड प्लस र एक्सजेड प्लस लक्जरी गरी तीन ट्रिममा उपलब्ध छ । यो नयाँ इलेक्ट्रिक कारले ग्लोबल एनक्याप सेफ्टि टेष्टमा ४ स्टार रेटिङ पाएको छ ।