मारुती अल्टो थप पावरफुल भएर आउँदै, सेलेरियोको इन्जिन जडान हुन सक्ने

मारुती सुजुकीको इन्ट्री लेभल ह्याचब्याक कार अल्टो थप पावरफुल इन्जिन सहित आउने संभावना देखिएको छ । कम्पनीले यो कारमा अब सेलेरियोमा उपलब्ध गराउँदै आएको १.० लिटर के १० सी डुअल जेट इन्जिन जडान गर्न सक्ने बताएको छ । उक्त इन्जिन राखेर अहिले यसको नयाँ डिजाइन तयार गरिरहेको जनाइएको छ ।

यसै बर्षको अन्त्यसम्म लन्च गर्ने तयारीमा रहेको मारुतीले यो लोकप्रिय ह्याचब्याकलाई यसअघिकै ८०० सिसी र १ हजार सिसीमा ल्याउने तयारी थालेको हो । इन्टेरियर र एक्सटेरियर दुबै पाक्षमा ब्यापक परिबर्तन सहित सार्बजनिक हुने तयारीमा रहेको यो नयाँ कारलाई हलुका बनाउन हर्टटेक्स आर्किटेक्चरमा तयार गर्न लागिएको छ । जुन आर्किटेक्चरमा वागेन आर र नयाँ सेलेरियो उत्पादन भई बजारमा आइसकेका छन् ।

नयाँ अल्टोमा रिडिजाइन गरिएको ग्रिल, नयाँ हेडल्याप, नयाँ बम्पर, नयाँ बोनेट, अपडेट गरिएको फगल्याम्प र फराकिलो सेन्टर एयर इन्लेट लागायत अन्य फिचर्स थप हुनेछन् । साथै तयाँ स्टायलको टेलगेट, एलइडी टेल ल्याम्प र टप भेरियन्टमा ७ इन्चको टचस्क्रिन इन्फोटेन्मेन्ट सिस्टम, अपडेट गरिएको इन्स्ट्रुमेन्ट क्लस्टर, नयाँ स्टेरिङ ह्विल र ड्यासबोर्ड समेत नयाँ हुनेछन् ।

भारतीय बजारमा बिगत लामो समयदेखी सर्बाधिक बिक्री हुने कारको सुचीमा पहिलो स्थान ओगट्दै आएको अल्टोलाई नेपालमा भने ट्याक्सीका रुपमा बढी रुचाइएको छ ।