नामसारी गर्नेले फागुन देखि र नवीकरण गर्नेले जेठ देखि अनिवार्य इम्बोस्ड नम्बर प्लेट लिनु पर्ने

काठमाडौं – यातायात व्यवस्था विभागले आगमी फागुन १ देखि सवारी साधन नामसारी गर्ने ग्राहकले इम्बोस्ड नम्बर प्लेटका लागि आवेदन दिनु पर्ने व्यवस्था गर्ने भएको छ । यातायात व्यवस्था विभागका महानिर्देशक नमराज घिमिरेले फागुन १ देखि नामसारी गर्ने ग्राहकका लागि मात्र यो व्यवस्था गर्न लागेको बताएका छन् ।

महानिर्देशक घिमिरेले भने, ‘फागुन १ देखि यो प्रक्रिया शुरु भएर लगातार जारी रहने छ । माघ भित्र सकिसक्ने भनेको होइन । यस पछि विस्तारै सबैले यो प्रक्रियामार्फत इम्बोस्ड नम्बर प्लेट लिन सक्ने व्यवस्था हुनेछ ।’

त्यसैगरी महानिर्देशक घिमिरेका अनुसार आगमी २०७९ जेठ १ देखि नवीकरण गर्नेले पनि नयाँ इम्बोस्ड नम्बर प्लेटका लागि आवेदन दिन सक्ने बताए । हाल प्रदेश सरकारको अधिकार क्षेत्र भित्र पर्ने भएकाले प्रदेशकै ऐन कानुन अनुसार यो सबै कार्य हुने उनले बताए ।

नवीकरण प्रक्रिया नियमित भएको र अहिले सहजताका लागि मात्र नवीकरण गर्दा इम्बोस्ड नम्बर प्लेट पनि जडानका लागि आवेदन दिन सकिने व्यवस्था गर्न लागेको उनले बताए ।

नयाँ नम्बर प्लेटको आवेदन दिन कार्यालय पुग्नु नपर्ने र यसका लागि सबै अनलाइनमार्फत गर्ने गृहकार्य भइरहेको घिमिरेले बताए । घरैमा बसेर आवेदन दिन, राजस्व तिर्न र सबै कार्य गर्न सकिने उनले बताए । बायोमेट्रिक कार्यका लागि मात्र कार्यालय पुग्नु पर्ने उनको भनाइ छ ।

इम्बोस्ड नम्बर प्लेट जडानका लागि हाल बागमतीको काठमाडौं, गण्डकीको पोखरा र लुम्बिनीको बुटवलमा आवश्यक तयारी भइसकेको र कर्णालीको सुर्खेतमा पनि केही दिन भित्रै तयारी पुरा हुने उनले बताए । त्यसैगरी बाँकी अन्य कार्यालयमा पनि यसको सम्पूर्ण तयारी भइरहेको छ ।

इम्बोस्ड नम्बर प्लेट जडान भएका गाडीको वारेमा सम्पूर्ण जानकारी राख्नका लागि विभिन्न १० स्थानमा आरएफआईडी गेट राख्ने तयारी समेत भइरहेको उनले बताए ।

इम्बोस्ड नम्बर प्लेट अनिवार्य गर्ने तयारी विभागले धेरै पटक गरे पनि यसको कार्यान्वयन भने अझै हुन सकेको छैन ।