आइडिया फर नेपालले आधुनिक पार्किङ सिस्टम ल्याउने

काठमाडौं – विश्वका विभिन्न देशमा पार्किङ लगायत विभिन्न व्यवसाय गरिरहेका ‘आइडिया ग्रुप’को नेपाल शाखा ‘आइडिया फर नेपाल’ ले नेपालमा आधुनिक पार्किङ सिस्टम भित्र्याउने भएको छ ।

हङकङमा मुख्य कार्यालय रहेको ‘आइडिया ग्रुप’ गैरआवसीय नेपाली तथा विदेशी साझेदारहरु संलग्न एक बहुराष्ट्रिय कम्पनी हो । बुधबार राजधानीमा आयोजित एक कार्यक्रमका बीच पूर्व राष्ट्रपति डा. रामवरण यादवले यो परियोजनाको उद्घाटन गरे । परियोजना उद्घाटनका अवसरमा बोल्दै पूर्व राष्ट्रपति डा. यादवले भने, ‘नेपालमा जलविद्युत, पर्यटन, कृषि तथा जडिबुटी प्रशोधनको क्षेत्र लगानीका लागि उर्वर रहेको छ र विश्वका विभिन्न देशमा रहेका नेपालीहरुले यसतर्फ ध्यान दिन जरुरीछ ।’ उनले विदेशमा आर्जन गरेको ज्ञानबाट भारतीयहरुले बैङ्लोरमा ठूलो परिवर्तन ल्याएको उदाहरण दिँदै गैरआवासीय नेपालीहरुले पनि त्यसतर्फ ध्यान दिनुपर्ने बताए ।

कार्यक्रममा परियोजनाबारे जानकारी दिँदै आइडिया नेपालका अध्यक्ष गोकर्ण श्रेष्ठले अत्याधुुनिक कार पार्किङ सिस्टम भित्र्याएपछि दुई वटा कार पार्किङ गर्ने स्थानमा दर्जनौं कार पार्किङ गर्न सकिने बताए । विभिन्न देशमा काम गरेको अनुभवको आधारमा नेपालमा पनि काम गर्न लागेको बताए ।

एक छुट्टै प्रसंगमा उनले आइडियाको विभिन्न परियोजनामार्फत आगामी १० वर्षभित्र दश लाख जनालाई उद्यमी बनाउने सोच रहेको बताए । उनका अनुसार यो संस्था हाल विश्वका विभिन्न देशमा चार सयभन्दा बढी परियोजनाहरुमा संलग्न छ । जसमध्ये ५० वटालाई आफैँले नेतृत्व गरिरहेको छ ।

संस्थाले अफ्रिकाको सुनखानी, यूरोपमा पार्किङ, रियर स्टेट, कृषि तथा अन्य विविध क्षेत्रमा लगानी गरिरहेको छ । करिब पाँच वर्षअघिदेखि नेपालमा पनि यसले कृषि, घरजग्गा, पर्यटनलगायतको क्षेत्रमा लगानी गरिरहेको छ ।

संस्थाले कीर्तिपुर, बुटवल, नेपालगञ्ज, पोखरालगायतको क्षेत्रमा ‘मेघा सिटी’ निर्माणका अबधारणासहित आवास निर्माण गर्दैछ । त्यस्तै सिन्धुपाल्चोकमा फलफुल तथा जुम्लामा स्याउ फर्म सञ्चालनको लागि प्रक्रिया आरम्भ गरेको छ ।

कार्यक्रममा संस्थाका दिर्नेशक रोजिना प्रधान राईले नेपालीहरुलाई विश्वभर कामदारको रुपमा मात्र हेरिने वर्तमान परिस्थितिलाई उल्टाउँदै नेपालीहरु पनि ‘इन्टरप्रेनर’ हुन् भन्ने स्थापित गराउन आफूहरु लागि परेको बताइन् ।