मुलकोटमा बन्यो हुन्डाईको चार्जिङ स्टेशन : ३१ स्टेशन बने, एक महिनामै ४० पुग्ने

काठमाडौं – हुन्डाइले हिजो सिन्धुलीको मुलकोटमा नयाँ चार्जिङ स्टेशन सञ्चालनमा ल्याएको छ । यससँगै देशभर हुन्डाईका ३१ चार्जिङ स्टेशन पुगेको नेपालका लागि आधिकारिक वितरक लक्ष्मी इन्टरकन्टिनेन्टलले जनाएको छ । जनवरी महिनाभर ४० चार्जिङ स्टेशन पु-याउने कम्पनीको योजना रहेको बताइएको छ ।

यी स्थानमा हुन्डाईका साथै अन्य ब्रान्डका गाडी समेत चार्ज गर्न सकिने छ । हुन्डाई गाडी निःशुल्क रुपमा चार्ज गर्न सकिने छ भने अन्य ब्रान्डका लागि स्थान अनुसार चार्जिङ शुल्क लाग्ने छ ।

हुन्डाई गाडीको नेपालको लागि आधिकारिक बिक्रेता लक्ष्मी इन्टरकन्टिनेन्टल प्रालिले विद्युतीय गाडीको क्षेत्रमा ठूलो कदम चालिरहेको छ । नेपालमा हुन्डाईसँग हाल इलेक्ट्रिक सवारीमा कोना र आयोनिक नामक दुई मोडलहरू छन् ।

कम्पनीले काठमाडौंको कुपण्डोल, तिनकुने, पुल्चोक, सिनामंगल, नक्साल र थापाथलीमा चार्जिङ स्टेशन निर्माण गरेको छ । पोखरामा पनि विभिन्न स्थानमा चार्जिङ स्टेशन संचालनमा छन् भने भैरहवा, बुटवल, नेपालगञ्ज, धनगढी, विरगंज, विराटनगर, इटहरी, भरतपुर, विर्तामोडमा संचालन गरिरहेको छ ।

गाडी विक्रीसँगै चार्जिङ स्टेशन निर्माण बढाउनु पर्ने अहिलेको आवश्यकतालाई ध्यानमा राखी थप चार्जिङ स्टेशनहरू निर्माण गर्ने योजना बनाइरहेको जनाएको छ ।