नयाँ स्कुटर र लगानीकर्ता थप भएसंगै बेनेलीले माग्यो एकैपटक २१ स्थानमा डिलर

बेनेली मोटरसाइकलको नेपालका लागि आधिकारिक बितरक केटिएम इन्टरनेश्नल ट्रेडिङले एकैपटक देशका २१ स्थानमा डिलर आह्वान गरेको छ । केहि दिनअघि मात्र नयाँ स्कुटर प्यानेरिया १२५ भित्राएको यो कम्पनीमा दुई चर्चित अटोमोबाइल ब्यावसायी सन्दिप शारडा र आकाश गोल्छा समेत संलग्न भएको जानकारी दिइएको थियो ।

जसमध्ये शारडा निशान गाडीको बितरक पायोनियर मोटोकर्पका प्रबन्ध निर्देशक हुन् भने गोल्छा फोर्ड गाडीको बितरक जिओ अटोमोबाइल्सका प्रबन्ध निर्देशक । यी दुई ब्यवसायी भित्रिनुअघि यो कम्पनीमा पन्चकन्या ग्रुपका निर्देशक उदिप श्रेष्ठ र फिस्टेल एयरका अध्यक्ष बिकास राणाको स्वमित्व रहेको थियो ।

नयाँ स्कुटर र लगानीकर्ता थपिएको केही दिनपछि नै एकैपटक यति धेरै संख्यामा डिलर आह्वान भएपछि आगामी दिनमा बेनेलीले आक्रमक बजार रणनिती अबलम्बन गर्ने आँकलन गरिएको छ । कम्पनीले उपत्यकामा टेकु, बालाजु, कुमारीपाटी र बौद्धमा डिलर आह्वान गरेको छ भने उपत्यका बाहिर बनेपा, धादिङ्ग, हेटौडा, दमौली, पोखरा, बाग्लुङ, टिकापुर, मेहन्द्रनगर, तुल्सीपुर, जिपुर–४, सिमारा, बिरगंज बर्दिबास, गाइघाट, राजबिराज, धरान र बिराटचोकमा डिलर आह्वान गरेको हो ।

५ बर्षअघि नेपाल भित्रिएको इटायिन ब्रान्ड बेनेलीसंग हाल नयाँ भित्रिएको प्यानेरिया १२५ स्कुटरसहित १८० एस, टिएनटी १३५, टिएनटी ६००, टिएनटी ३०२ एस, टिएनटी १५०, टिआरके २५१, टिएनटी १५ र ७५२ एस गरी कुल ९ मोडलका बाइक उपलब्ध छन् ।