सिंगल चार्जमा एक हजार किमी चल्ने इलेक्ट्रिक कार चीनमा सार्वजनिक, टेस्लासँग प्रतिस्पर्धा गर्ने

राम्रो ब्याट्री रेन्ज भएका इलेक्ट्रिक कारको माग विश्वव्यापी रुपमा बढिरहेको छ । हालै चिनियाँ इलेक्ट्रिक भेइकल कम्पनी निओले नयाँ इलेक्ट्रिक कार निओ ईटी५ लन्च गरेको छ ।

नियो ईटी५ ब्याट्रीको रेन्ज एक पटकको फुल चार्जमा एक हजार किलोमिटरसम्म रहेको दाबी गरिएको छ । नियो ईटी५ ले टेस्ला मोडल ३ इलेक्ट्रिक कारसँग प्रतिस्पर्धा गर्नेछ ।

नियो ईटी५ इलेक्ट्रिक कारको मूल्य चीनमा ३९ लाख ३ हजार २६४ युआनमा लन्च गरिएको छ । यो मूल्य चीनमा सरकारी अनुदानविना भएकोले अनुदान लगाएपछि यसको मूल्य अझै घट्न सक्छ ।

सेडान सेग्मेन्टमा रहेको सो इलेक्ट्रिक कार विभिन्न ब्याट्री रेन्जमा ल्याइएको छ । यसको डेलिभरी अर्को वर्ष सुरु हुनेछ । सो ईभी केही वर्षमा नेपाली सडकमा पनि देखिने सम्भावना छ ।

नियो ईटी५को लुक र फिचर इलेक्ट्रिक सेडान जस्तै शानदार देखिन्छ । कालो र सुनौलो रङगमा उपलब्ध यो इलेक्ट्रिक कारमा ब्याट्री परिवर्तन पनि गर्न सकिन्छ । नियो ईटी५को ७५ केडब्ल्युएच ब्याट्रीको रेन्ज ५५० किलोमिटर र १०० केडब्ल्युएच ब्याट्रीको रेन्ज १००० किलोमिटर भएको बताइएको छ ।

कारमा कनेक्टेड कार टेक्नोलोजी, इन्टिग्रेटेड अगमेन्टेड रियालिटी र भर्चुअल रियालिटी, एम्बियन्ट लाइटिङ र डल्बी एटमस सराउण्ड सिस्टमलगायत कैयौ फिचर रहेको छ ।