इलेक्ट्रिक माइक्रोमा बढ्यो क्रेज, गरुड सेक्युरिटिजले किन्यो एकैपटक ४ इलेक्ट्रिक माइक्रो बस

नेपाली बजारमा इलेक्ट्रिक भेइकलको माग दिनप्रतिदिन बढ्दै गएको छ । माग अनुरुप आपूर्ति हुन नसक्दा अधिकांश ब्रान्डले अभावको अवस्था समेत झेल्नु परेको छ । जसका कारण अहिले ग्राहकले चाहेर पनि भनेकै समयमा यस्ता सवारीसाधन खरिद गर्न सक्ने अवस्था रहेको देखिदैन ।

बजारमा अहिले इलेक्ट्रिक कारसँगै अन्य सेग्मेन्टका यस्ता साधनको माग समेत बढ्न थालेको छ । पछिल्लो समय दीगो ग्रुप अफ कम्पनिज अन्तर्गतको एनईभी नेपालले आयात गर्दै आइरहेको डिएफएसके ब्रान्डको माइक्रो बसमा विभिन्न व्यावसायिक संस्थाहरुले रुचि देखाउन थालेका छन् । हालै गरुड सेक्युरिटिज प्रालिले एकैपटक ४ वटा यो माइक्रो बस खरेद गरेबाट पनि यो तथ्य पुष्टि भएको हो ।

केहीसमय अघिमात्र नेपाल भित्रिएको यो ब्रान्डको माइक्रो बस हालसम्म २५ भन्दा बढी युनिट बिक्री भैसकेको कम्पनी स्रोतको भनाइ छ । उक्त स्रोतका अनुसार २५ युनिटकै हाराहारीमा ग्राहकले बुकिङ समेत लिएका छन् । ‘बजारमा माग बढिरहे पनि माग अनुसार आपूर्ति हुन नसक्दा ग्राहकलाई भनेकै समयमा डेलिभरी दिन सकिरहेका छैनौ । आपूर्तिमा सहजता आउने बित्तिकै डेलिभरी दिने शर्तमा बुकिङ लिएर बस्नु परेको छ’ उक्त स्रोतले भन्यो ।

यस्तो छ माइक्रो बसको मूल्य, पावर र फिचर्स
चिनियाँ ब्रान्ड डिएफएसकेले उत्पादन गर्ने डाँफे ११ सिटरको माइक्रो बस हो । यसमा ४२ किलोवाट आवरको ब्याट्री र ६० किलोवाट क्षमताको मोटर जडान गरिएको छ । जसले २०० एनएम टर्क जेनेरेट गर्न सक्ने दाबी गरिएको छ । यो माइक्रो बसको मूल्य नेपाली बजारमा ४४ लाख ९५ हजार रुपैयाँ निर्धारण गरिएको छ ।

यसमा ब्लुटुथ कनेक्टिभिटी लगायत अन्य थुप्रै कम्फर्ट फिचर्स उपलब्ध गराइएको छ । साथै इपिएस, एबिएस विथ इबिडी र हिल एसिस्ट कन्ट्रोल लगायत अन्य थुप्रै प्रकारका सेफ्टि फिचर्स समेत समाबेश गरिएको छ । कम्पनीले यो माइक्रो बसमा रिजेनेरेटिभ ब्रेकिङ सिस्टम समेत दिएको छ ।

एकपटक फुल चार्ज गर्दा २५० किलोमिटरसम्म यात्रा गर्न सकिने यसको ब्याट्रीलाई ३० किलोवाटको डिसी चार्जरबाट १ घन्टा ३५ मिनेट र ७ किलोवाटको फास्ट चार्जरबाट ६ घन्टा ५० मिनेटमा फुल चार्ज गर्न सकिन्छ । यसरी चार्ज गर्दा प्रतिकिलोमिटर जम्मा १ रुपैयाँ ६ पैसामात्र सञ्चालन खर्च आउने दाबी गरिएको छ ।

कम्पनीले यसको ब्याट्रीमा ५ बर्ष अर्थात १ लाख २० हजार किलोमिटरसम्मको वारेन्टी सेवा प्रदान गर्दै आइरहेको छ । हाल यसको काठमाडौ, कुरिनटार, मुलकोट र सिन्धुलीमा चार्जिङ स्टेशन बिस्तार भएको छ ।