काठमाडौंको सडक सुहाउँदो ओकिनावाका ३ इलेक्ट्रिक स्कुटर, यस्तो छ मूल्य र फिचर्स

भारतमा निर्मित ओकिनावा ब्रान्डको इलेक्ट्रिक स्कुटरले बलियो, मजबुत र उच्चतम माइलेज दिने स्कुटरका रुपमा आफूलाई स्थापित गराउँदै लगेको छ । नेपालका लागि आधिकारिक बितरक बिक्की इन्टरप्राइजेजले नेपालको पहाड र तराई दुबै भेगमा चलाउन मिल्ने भिन्न बिशेषता सहित यी स्कुटर आयत गरी कारोबार गर्दै आइरहेको छ । जसमध्ये काठमाडौको शोरुममा यसको आई–प्रेज प्लस, प्रेज प्रो र रिज प्लस गरी तीन भिन्न मोडलका स्कुटर उपलब्ध छन् । यी मध्ये आई–प्रेज प्लसलाई कम्पनीले प्रिमियम स्कुटर भनेको छ भने अन्य २ मोडल औषत रेन्जका हुन् । यी स्कुटरको मूल्य क्रमश ३ लाख ४० हजार, २ लाख ६० हजार र २ लाख ३० हजार रुपैयाँ निर्धारण गरिएको छ ।

प्रिमियम मोडलका रुपमा लिइएको यसको आई–प्रेज प्लसमा १ हजार वाट क्षमताको मोटर जडान गरिएको छ । ३.३ किलोवाट आवर क्षमताको लिथियम आयोन ब्याट्री प्याक जडान गरिएको यो स्कुटरलाई एकपटक फूल चार्ज गर्दा १६० किलोमिटर सम्म कुदाउन सकिन्छ । इको, स्पोर्ट र टर्बो मोड उपलब्ध गराइएको यो स्कुटरलाई टर्बो मोडमा चलाउँदा ७० किलोमिटर प्रतिघन्टाको गतिमा हाक्न सकिन्छ । अगाडी र पछाडी दुबै चक्कामा डिस्क ब्रेक दिइएको आई–प्रेज प्लसमा इलेक्ट्रोनिक– एसिस्टेड ब्रेकिङ सिस्टम समेत दिइएको छ । अगाडी हाइड्रोलिक टेलिस्कोपिक र पछाडी डबल शक सस्पेन्सन जडान गरिएको यो स्कुटरको ग्राउन्ड क्लिरियन्स १७५ एमएम रहेको छ ।

यो स्कुटरमा कम्पनीले एन्टि थेप्ट अलार्म सहितको सेन्ट्रल लकिङ, किलेस इन्ट्रि, फाइन्ड माई स्कुटर फंक्सन, मोबाइल चार्जिङ युएसबी पोर्ट, मोटर वाकिङ एसिस्टेन्स, इमोबिलाइजेसन, सेक्योर पार्किङ, ट्रयाकिङ एन्ड मोनिटरिङ, मेन्टिनेन्स÷इन्सुरेन्स रिमाइन्डर, ब्याट्री इन्फो, स्पिड अलर्ट र ड्राइभ स्कोर लगयात आधुनिक फिचर्स उपलब्ध गराएको छ ।

त्यसैगरी १ हजार वाट क्षमताको मोटर जडान गरिएका अर्को इलेक्ट्रिक स्कुटर प्रेज प्रोमा २ किलोवाट आवर क्षमताको लिथियम आयोन ब्याट्री प्याक दिइएको छ । यो स्कुटरलाई एकपटक फूल चार्ज गर्दा ११० किलोमिटरसम्म कुदाउन सकिन्छ । आई–प्रेज प्लसमा जस्तौ यसमा पनि इको, स्पोर्ट र टर्बो मोड उपलब्ध गराइएको यो स्कुटरलाई पनि टर्बो मोडमा चलाउँदा ७० किलोमिटर प्रतिघन्टाको गतिमा हाक्न सकिन्छ । ब्रेकिङ सिस्टम, सस्पेन्सन र अन्य फिचर्स आई–प्रेज प्लस सरहनै रहेको छ ।

सानो र सस्तो मूल्यको रिज प्लसमा भने ८ सय वाट क्षमताको मोटर जडान गरिएको छ । यो स्कुटरमा १.७५ किलोवाट आवर क्षमताको लिथियम आयोन ब्याट्री प्याक दिइएको छ । यो स्कुटरलाई एकपटक फूल चार्ज गर्दा १०० किलोमिटरसम्म कुदाउन सकिने दाबी गरिएको छ । दुबै चक्कामा ड्रम ब्रेक जडान गरिएको यो स्कुटरमा समेत यसअघिका २ वटा मोडल आई–प्रेज प्लस र प्रेज प्रोमा उपललब्ध फिचर्सलाई समाबेश गरिएको छ ।