यस्तो छ ड्युअल टोनयुक्त बीएस६ रेनो ट्राइबर

काठमाडौं – नेपाली बजारमा ड्युअल टोन सहितको बीएस६ रेनो ट्राइबर एसयूभी केही समय यता उपलब्ध भइरहेकोे छ । नेपालका लागि आधिकारिक वितरक एड्भान्स्ड अटोमोबाइल्सले यसको बुकिङ खुला गरेको छ । रेनोका देशभर रहेका सोरुमहरुमा गएर वा रेनो नेपालको वेबसाइटबाट यसको बुकिङ गर्न सकिने छ ।

रेनो ट्राइबर पहिले देखि नै उपलब्ध भए पनि हाल ७ सिटर रेनो ट्राइबरमा बीएस६ इन्जिन जडान गरिएको छ । यसमा स्टेयरिङ माउन्टेड अडियो एन्ड फोन कन्ट्रोल, ड्युअल टोन तथा स्टाइलिस रुफरेल, ओआरभीएममा एलईडी टर्न इन्डिकेटर, सिट हाइट एड्जस्ट गर्न सकिने ६–वे एड्जस्टेबल ड्राइभर सिट जस्ता फिचर रहेका छन् ।

रेनो ट्राइबर नेपाली बजारमा उपलब्ध एमयूभी अर्थात मल्टी युटिलिटी भेइकल हो । यसको दुई भेरिएन्ट नेपाली बजारमा उपलब्ध छ । रेनो ट्राइबर ड्युअल टोन म्यानुअल ट्रान्समिसनको मूल्य ३५ लाख ४९ हजार र अटोमेटिक ट्रान्समिसनको मूल्य ३६ लाख ९९ हजार रुपैयाँ तोकिएको छ ।

१८२ एमएमको ग्राउन्ड क्लियरेन्स भएको सो एमयूभीको अघिल्लो भागमा प्रोजेक्टर हेडल्याम्प छ भने डे टाइम रनिङ लाइट आदि सुविधा उपलब्ध छ । एबीएस, ईबीडी आदि सहित चार एयरब्यागलगायतका विभिन्न सेफ्टी फिचर यसमा उपलब्ध छन् ।

इन्टेरियरमा ८ इन्चको टचस्क्रिन इन्फोटेनमेन्ट सिस्टम छ, जसले एन्ड्रोइड अटो र एप्पल कारप्ले सपोर्ट गर्छ । भ्वाइस कमान्डका साथै हालको मोडलमा स्टेयरिङ माउन्टेड कन्ट्रोलको सुविधा समेत छ । ड्युअल हर्नका साथै एड्जस्टेबल ड्राइभर सिटलगायतका विभिन्न सुविधा यसमा उपलब्ध छन् । ड्युअल टोन इन्टेरियर पनि यसमा भएको मुख्य परिवर्तन हो ।

कुल ग्लोब बक्सका साथै प्रत्येक रोमा एसी उपलब्ध छ । पुस स्टार्ट बटन सुविधा भएको यो गाडीको भित्रैबाट मिरर मिलाउन सकिन्छ ।

रेनो ट्राइबर नेपाली बजारमा उपलब्ध ७ सिटर एसयूभी हो । पहिलो लहरमा दुई जना, दोस्रो लहरमा तीन जना र तेस्रो लहरमा दुई जना गरी सात जना यसमा बस्न सकिन्छ । तेस्रो लहरको सिटलाई निकालेर सामान राख्न पनि सकिन्छ । यसरी निकाल्दा ६२५ लिटरको बुट स्पेस बन्छ । सिट राख्दा ८५ लिटर स्पेस बाँकी रहन्छ ।

रियर क्यामेरा, रियर पार्किङ सेन्सर, रियर वाइपर र रियर डिफोगर तथा ड्राइभर र को–ड्राइभरका लागि सिट बेल्ट रिमाइन्डर छ भने ओभर स्पिड अलर्ट समेत गराउछ । स्पिड सेन्सिङ डोर लक र इम्प्याक्टको अवस्थामा अटो डोर लकको सुविधा छ ।

सो कारमा सिंगल पावरट्रेनको विकल्पमा १.० लिटर, ३ सिलिन्डर युनिट प्रयोग गरिएको छ । सो इन्जिनले ७० बीएचपीको पावर र ९६ एनएमको टर्क जेनेरेट गर्छ ।