संसारकै तीव्र गतिको इलेक्ट्रिक कार चार्जर आउने, ३ मिनेटमा १०० किमी रेन्ज

स्विस इन्जिनियरिङ कम्पनी एबीबीले संसारकै सबैभन्दा तीव्र इलेक्ट्रिक कार चार्जर लन्च गरेको छ । कम्पनीले टेस्ला, हुन्डाई र अन्य सवारी निर्माता कम्पनीहरुद्वारा इलेक्ट्रिक कार उत्पादन बढाइरहेको सन्दर्भमा त्यस्ता गाडीको चार्जिङ जरुरत पुरा गर्नका लागि नयाँ चार्जर विकसित गरेको बताएको छ ।

एबीबीले टेरा ३६० मोडुलर चार्जर लन्च गर्ने तयारी गरेको छ, जसले ईभी चार्जिङ व्यवसाय शुरु गर्ने योजना बनाएको छ । यसका लागि करिव ३ अर्ब डलर लाग्ने बताइएको छ ।

एबीबीका अनुसार उक्त डिभाइसले एकै पटक चार सवारी साधन चार्ज गर्न सक्ने छ । ३६० किलोवाट क्षमताको यो चार्जरले कुनै पनि कारलाई १५ मिनेट वा यो भन्दा पनि कम समयमा फुल चार्ज गर्न सक्छ । यसबाट चार्जिङ समयको वारेमा हाल भएको चिन्तालाई यसले कम गर्नेछ । हाल फुल चार्जका लागि केही घण्टा लाग्ने अवस्था छ ।

एबीबीको टेरा ३६० ले ३ मिनेट भन्दा पनि कम समय चार्ज गरे पछि १०० किलोमिटर रेन्ज दिने गरी इलेक्ट्रिक गाडी चार्ज गर्नेछ । युरोपमा यो वर्षको अन्त्यसम्ममा यो उपलब्ध हुनेछ । त्यसपछि २०२२ सम्म यो अमेरिका, ल्याटिन अमेरिका र एसिया प्रशान्त क्षेत्रमा उपलब्ध हुनेछ ।

एबीबीले ट्रक, जहाज र रेलवे जस्ता कमर्सियल सवारी साधनका साथै इलेक्ट्रिक सवारी साधनका लागि विभिन्न पूर्वाधार, चार्जिङ र इलेक्ट्रिफिकेसन सोलुसन प्रदान गर्दै आएको छ ।