ह्यावल जोलियन मोडलमा आकर्षक फिचर सहितको टप भेरिएन्ट नेपाल ल्याउँदै भीजी इम्पेक्स

काठमाडौं – नेपालमा ग्रेटवाल र ह्यावलका गाडीहरु बिक्री–वितरण गरिरहेको भीजी इमपेक्सले हाल बजारमा उपलब्ध ह्यावल जोलियनको टप भेरिएन्ट नेपाली बजारमा उपलब्ध गराउने भएको छ ।

आफ्नो कर्पोरेट फिलोसफी ‘इमप्रुभिङ लिटल बाई लिटल एभ्रिडे’ लाई अनुसरण गर्दैै यसले ग्राहकको यात्रालाई अझ विलासी बनाउने कम्पनीको भनाइ छ । ६० वटा मुलुकहरुमा ६५ लाख भन्दा धेरै बिक्री भइसकेको ह्यावल विगत ११ वर्ष देखि चीनमा एसयूभी बिक्री गर्ने नम्बर १ ब्रान्ड हो ।

कलात्मक र आधुनिक इन्जिजियरिङबाट निर्मित जोलियनले गाडीहरुमा नयाँ सोचलाई मूर्तरुप दिएको कम्पनीको भनाइ छ । यसमा प्रयोग गरिएको १८ इन्चको आल्मुनियम अलोय ह्विल, ७३ प्रतिशत हाई स्ट्रेन्थ स्टिल बडीदेखि सिक्स–वे इलेक्ट्रिक एड्जस्टेबल सिट समेतले यसको परिष्कृत निर्माणमा कुनै कमी महशुस हुन नदिएको बताइन्छ । यसको प्यानोरामिक सनरुफ र ड्युअल जोन अटो एसीले आरामदायी यात्रामा भव्यता थप्न मद्दत गर्दछ ।

१.५ लिटरको टर्बो पेट्रोल इन्जिन, ६ ओम्नी डाइरेक्सनल एयरब्यागको सुरक्षा, ३६० डिग्री भ्यु, ब्लाइन्ड स्पट मोनिटरिङ र हाइ होल्ड कन्ट्रोल तथा हिल डिसेन्ट कन्ट्रोल भएको जोलियनको निर्माण नै सुरक्षालाई ध्यानमा राखेर गरिएको कम्पनीको भनाइ छ । यसको आकर्षक हेड–अप डिस्प्ले (एचयूडी) ले गाडीको गति आदिको सूचना दिएर यात्रालाई सुरक्षित बनाउँछ ।

अभिनव सोच भएकाहरुद्वारा डिजाइन गरिएको सो एसयूभीलाई उच्च प्रदर्शन गर्ने प्रविधिले जीवन्त बनाउँछ । एप्पल कारप्ले र एन्ड्रोइड अटोसहितको १२.३ इन्च स्मार्ट टचस्क्रिन जस्तो यात्रालाई आरामदायी बनाउने फिचरहरुले व्यस्त दैनिकीमा विलासिता थप्नेछ ।

नेपाली बजारमा ह्यावल जोलियनको स्टार्टिङ र हाई भेरिएन्ट अर्थात एमटी र एटी पहिले नै उपलब्ध छ र पारखीहरुबाट सकारात्मक समीक्षा पाइरहेको बताइएको छ ।