लन्च भयो रोयल इन्फिल्ड क्लासिक ३५० को अपडेटेड मोडल

भारतमा २०२१ मोडलको रोयल इन्फिल्ड मोटरसाइकल क्लासिक ३५० लन्च भएको छ । यसको मूल्य १ लाख ८४ हजार देखि २ लाख ५१ हजार भारु सम्म तोकिएको छ ।

कम्पनीले केही दिन पहिले सार्वजनिक गरेको मेटियर ३५० जस्तै यसलाई पनि जे प्लेटफर्ममा बनाइएको छ । यो प्लेटफर्ममा बनेको यो दोस्रो मोटरसाइकल हो । यसको अर्थ यसमा पनि मेटियर जस्तै डबल क्रेडल च्यासिस दिइएको छ । यो बाइक रेडिच, हाल्स्योन, सिग्नल्स, डार्क र क्रोम गरी ५ भेरिएन्टमा उपलब्ध छ । त्यसैगरी ११ कलर अप्सनमा यसलाई छान्न सकिन्छ ।

यो मोटरसाइकलमा पहिले जस्तै राउन्ड हेलोजन हेडल्याम्प, टियरड्रप आकारको फ्युल ट्यांक, सर्कुलर टर्न इन्डिकेटर र रियरभ्यु मिरर छ । त्यसैगरी यमसा फराकिलो ह्यान्डलबार, स्पोक ह्विल, बोटल ट्युब एक्जस्ट मफलर र राउन्ड टेलल्याम्प छ ।

पर्फमेन्सका लागि यसमा ३४९ सीसीको सिंगल सिलिन्डर एयरकुल्ड डीओएचसी इन्जिन छ, जसले २०.२ बीएचपी पावर र २७ एनएम टर्क जेनेरेट गर्छ । यसको इन्जिन फाइभ स्पिड गियरबक्सयुक्त छ ।

यसको ब्रेकलाई पनि अपडेट गरिएको छ । फ्रन्टमा ३ सय एमएमको डिस्क ब्रेक र रियरमा बाइबर क्यालिपरका साथ २७० एमएमको ब्रेक दिइएको छ । यो मोटरसाइकलको प्रतिस्पर्धा जावा, होन्डा हाइनेस सीबी ३५० र बेनेली इम्पेरियर ४०० जस्ता मोटरसाइकलसँग हुनेछ ।