नेटवर्क विस्तारमा एग्रेसिभ बन्दै जावा, दशै अगाडि थप ३ स्थानमा विस्तार गरिने

जावा मोटरसाइकलको आधिकारिक वितरक अग्नि मोटो ईंक नेटवर्क विस्तारमा एग्रेसिभ देखिएको छ । कम्पनीले देशका विभिन्न स्थानमा थ्रीएस सुविधा सहितको नेटवर्क विस्तारलाई तीव्रता दिँदै लगेको हो । कम्पनीले २ दिनको अन्तरालमा २ स्थानमा यस्तो नेटवर्क विस्तार गरेको छ भने दशैं अगाडि थप ३ स्थानमा विस्तार गर्ने कम्पनी स्रोतले बताएको छ ।

भदौ ७ गते नेपालगन्जमा शोरुम उद्घाटन गरेको अग्निले त्यसको २ दिनपछि सुर्खेतमा समेत नयाँ डिलर थप गरेको छ । यो सहित जावाको देशभर ११ वटा डिलर नेटवर्क विस्तार भैसकेको छ । यसअघि जावाले विर्तामोड, धरान, इटहरी, विराटनगर, लहान, पोखरा, नारायणघाट, बुटवल र भैरहवामा डिलर विस्तार गरिसकेको छ । काठमाडौंमा कम्पनी आफैंले उत्तरढोका र टेकुमा शोरुम सञ्चालन गर्दै आइरहेको छ ।

नेपाली बजारमा जावा, जावा फोर्टी–टु र फ्याक्ट्री–निर्मित पहिलो बब्बर पेराक सहित तीन मोडलका मोटरसाइकल उपलब्ध छन् । जसमध्ये जावा सिंगल च्यानल एबीएसको मूल्य ६ लाख ४८ हजार ५ सय र डबल च्यानल एबीएसको ६ लाख ७६ हजार ५ सय रुपैयाँ निर्धारण गरिएको छ ।

त्यसैगरी फोर्टी–टु सिंगल च्यानल एबीएसको ६ लाख २० हजार र डबल च्यानल एबीएसको ६ लाख ४८ हजार रुपैयाँ पर्छ । पेराकको भने ७ लाख ५० हजार रुपैयाँ तोकिएको छ ।