चर्चामा जावाको एड्भेन्चर टुरिङ मोटरसाइकल आरभीएम ५००

हालै इन्टरनेटमा एउटा मोटरसाइकलको तस्बिर निकै भाइरल बनेको छ । जावाको ब्याजिङ भएको स्क्र्याम्बलर भर्सनको सो बाइक हेर्दा निकै नै आकर्षक छ ।

यद्यपि सो बाइक ब्रिस्टोल भेलोस ५०० नामक मोटरसाइकलको रिब्याज भर्सन मात्र हो । ब्रिस्टोल फिलिपिन्समा रहेको कम्पनी हो र हालै चेक कम्पनी जावासँग यसको रणनीति साझेदारीका लागि सम्झौता भएको छ । त्यही सम्झौता अनुसार नै नयाँ मोटरसाइकल सार्वजनिक भएको हो ।

जावा मोटरसाइकलको स्वामित्व भएको कम्पनी क्लासिक लिजेन्ड्सले नेपालमा समेत जावा बाइक उपलब्ध गराइरहेको छ । यद्यपि सो मोटरसाइकलको क्लासिक लिजेन्ड्ससँग कुनै सम्बन्ध छैन । यसले गर्दा यो मोटरसाइकल भारत वा नेपाल आउने सम्भावना पनि छैन । तर पनि मोटरसाइकलको लुक्स र फिचरले भने धेरैलाई आकर्षण गरिरहेको छ ।

ब्रिस्टोल भेलोस ५०० मा आधारित सो मोटरसाइकलको स्क्र्याम्बलर भर्सनलाई आरभीआर ५०० र एड्भेन्चर भर्सनलाइ आरभीएम ५०० नाम राखिएको छ । यो मोटरसाइकलमा ४७१ सीसी प्यारालल ट्विन लिक्विडकुल्ड इन्जिन छ, जसले ४७ बीएचपी पावर र ४३ एनएम टर्क जेनेरेट गर्छ ।

यसको फ्रन्टमा अपसाइड डाउन फोर्क्स र रियरमा मोनोसक सस्पेन्सन उपलब्ध छ । सुरक्षाका लागि ड्युअल च्यानल एबीएस जस्ता फिचर उपलब्ध छन् । त्यसैगरी यसमा सेमी डिजिटल इन्स्ट्रयुमेन्ट क्लस्टर र एक यूएसबी सकेट स्ट्यान्डर्डको रुपमा उपलब्ध छ । यो मोटरसाइकलमा एड्भेन्चरका लागि उपयुक्त विभिन्न फिचर समेत उपलब्ध छन् ।