भाटभटेनीमा बन्दैछ ४४ गाडी राख्न मिल्ने २५ मिटर अग्लो स्मार्ट पार्किङ, छिट्टै सञ्चालनमा आउने

काठमाडौं – भाटभटेनीले नक्सालस्थित भाटभटेनी सुपर स्टोरमा निजी प्रयोजनका लागि बहुतले स्मार्ट पार्किङ निर्माण गरिरहेकोछ ।

भाटभटेनीको नक्सालस्थित मुख्य सुपरमार्केट परिसरमा बहुतले भर्टिकल पार्किङको काम निषेधाज्ञाकै बीच धमाधम भइरहेको हो । आधाभन्दा बढी सम्पन्न भइसकेको उक्त स्मार्ट पार्किङ सञ्चालनमा आउन भने अझै केही समय लाग्ने भए पनि केही दिनमै यसको परीक्षण गरिने छ ।

भारतको ओमेगा इन्जिनियरिङले निर्माण गरिरहेको स्मार्ट पार्किङ २५ मिटर अग्लो छ । यसमा एकै पटक ४४ गाडी पार्किङ गर्न सकिने छ । गाडीलाई पार्किङको तल्लो भागमा पु¥याए पछि स्वचालित रुपमा माथिल्लो तलामा गएर बस्ने छन् भने तल लिनका लागि कार्ड स्वाइप गरे पुग्ने छ ।

पार्किङका लागि विभिन्न प्रविधि उपलब्ध रहेकोमा भाटभटेनीमा निर्माणाधीन सो पार्किङका लागि भर्टिकल लिफ्टिङ पार्किङ सिस्टम अर्थात टावर पार्किङको प्रयोग गरिएको निर्माता कम्पनी ओमेगा इन्जिनियरिङका हेड अफ अपरेसन पार्थ भट्टाचार्यले बताए । उनका अनुसार कार पार्किङ गर्न आउने ग्राहकलाई एउटा कार्ड उपलब्ध गराइने छ । सोही कार्डमार्फत नै गाडीलाई पार्किङ गर्ने र फेरि निकाल्नका लागि आवश्यक कार्य गरिने छ ।

भारतका विभिन्न स्थानमा यस्ता भर्टिकल पार्किङ निर्माण गरिसकेको ओमेगा इन्जिनियरिङले नेपालमा भने पहिलो पटक यस्तो प्रविधिको पार्किङ निर्माण गरिरहेको बताएको छ ।

यो भन्दा पहिले काठमाडौं महानगरपालिका र अन्य निकायहरुले पनि बहुतले पार्किङ निर्माण गर्ने समाचार आए पनि कुनै पनि कार्यले व्यावहारिकता पाएका छैनन् ।