स्कोडा कुशाक साउनमा नेपाल आउने पक्का, स्कोडा नेपालको फेसबुक पेजमा ‘कमिङ सुन’ टिजर

काठमाडौं – स्कोडाको नयाँ एसयूभी कुशाक साउनमा नेपाली बजारमा आउने औपचारिक जानकारी सार्वजनिक भएको छ । नेपालका लागि स्कोडाको आधिकारिक वितरक एमएडब्ल्यु इन्टरप्राइजेजले आफ्नो फेसबुक पेजमा ‘कमिङ सुन’ लेखेर टिजर सार्वजनिक गरेको छ ।

स्कोडा नेपालको वेबसाइटमा समेत कुशाकलाई लिस्टिङ गरिएको छ । कुशाकको वारेमा रुचि राख्ने ग्राहकका लागि यो लिंक खोलेर आवश्यक जानकारी उपलब्ध गराउन समेत अनुरोध गरिएको छ ।

नेपाली बजारमा तीन ट्रिम र पाँच कलर अप्सनमा स्कोडा कुशाक उपलब्ध हुने बताइएको छ । आगामी जुन २८ मा भारतमा लन्च हुने घोषणा गरिएको स्कोडा कुशाकको नेपालमा ५० लाख देखि ६५ लाख रुपैयाँ सम्म मूल्य पर्ने अनुमान गरिएको छ ।

प्रोजेक्ट २.० अन्तर्गत फक्सवागन ग्रुपले भारतमा १ अर्ब युरो लगानी गरेको छ । एउटै बजारमा यो ग्रुपले पहिलो पटक यति धेरै लगानी गरेको हो । हालै पुनेमा अवस्थित चाकन प्लान्टबाट उत्पादित स्कोडा कुशाकको पहिलो युनिट रोल आउट भएको छ । यो एमक्यूबी–एओ–आईएन प्लेटफर्ममा आधारित छ । आईएनको अर्थ इन्डिया हो ।

यस अनुसार स्कोडा कुशाकमा ९५ प्रतिशत पार्ट्स स्थानीयकरण गरिएको छ, जसले गर्दा स्कोडा कुशाकको मूल्य र बिक्री पछिको सेवा मितव्ययी हुनेछ । भारतीय बजारका लागि नै नयाँ प्लेटफर्मको विकास गरिएको र स्थानीयकरण गरिएकोले यसको मूल्य प्रतिस्पर्धि हुने बताइएको छ ।

स्कोड कुशाक १.० लिटर र १.५ लिटर दुई पेट्रोल इन्जिनको साथमा लन्च गरिनेछ । यद्यपि नेपाली बजारमा आउने इन्जिन अप्सनको वारेमा कम्पनीले आधिकारिक जानकारी दिएको छैन ।

भारत र नेपालको बजारमा निकै नै समानता छ । भारतमै बनेको स्कोडा कुशाक नेपाली बजारमा उपलब्ध हुनेछ । त्यसैले स्थानीयकरण गरिएको र नयाँ प्लेटफर्ममा बनेको तथा इन्डिया २.० प्रोजेक्ट अन्तर्गत प्रशस्तै लगानी गरेर उत्पादन गरिएको एसयूभी स्कोडा कुशाकको लाभ नेपाली उपभोक्ताले पनि पाउने छन् ।