काठमाडौं उपत्यकामा विहान ९ बजेसम्म वर्कसप खुल्ने

काठमाडौं - काठमाडौं उपत्यकामा सवारी साधन मर्मतसम्भार गर्ने वर्कसप जेठ २१ देखि विहान ९ बजेसम्म खुल्न पाउने भएका छन् ।

उपत्यकाका तीन जिल्लाका प्रमुख जिल्ला अधिकारीको बैठकले वर्कसप राति ९ बजेदेखि विहान ९ बजेसम्म सञ्चालन गर्न दिने भएको हो । ‘सवारी साधन मर्मतका लागि वर्कसपहरु राती ९ बजे देखि बिहान ९ बजे सम्म संचालन गर्ने’ भनिएको छ ।

यसअघि उपत्यकामा सवारी साधन सञ्चालन गर्ने वर्कसप बन्द गरिएको थियो । त्यस्तै तरकारी, फलफूल, खाद्यान्न, दूध डेरी, मासु, खानेपानी, ग्यास पसल, डिपार्टमेन्टल स्टोर विहान ९ बजेसम्म खुल्ने भएको छ । ढुवानीका साधन राति ९ बजेदेखि विहान ९ बजेसम्म सञ्चालन हुन पाउनेछन् ।

काठमाडौं उपत्यकामा जेठ ३१ गतेसम्म निषेधाज्ञा थप गरिएको छ । सो अवधिमा सार्वजनिक एवं निजी सवारी साधन संचालनमा रोक लगाइएको छ भने अत्यावश्यक र बिरामी बोकेका अन्य सवारी साधन संचालन हुने छन् ।