कुनै बेला नेपालमा समेत निकै चर्चित पजेरोको उत्पादन बन्द हुने

पजेरो । जनआन्दोलन २०४६ पश्चात बनेको नयाँ संसदमा यसको निकै नै चर्चा भएको थियो । सांसदहरुलाई पजेरो सुविधा दिने तत्कालीन सरकारको निर्णयका कारण यसले निकै नै चर्चा पाएको थियो ।

विश्वमै महंगो मानिने पजेरोको चर्चा अझै पनि नेपालको संसदीय इतिहासमा हुने गरेको छ । तर हालै पजेरो अर्कैै समाचारका कारण चर्चामा रहेको छ । अब भने यसको उत्पादन नै बन्द हुने समाचारका कारण यसको चर्चा चुलिएको हो ।

युवादेखि हरेक वर्गका लागि आइकनिक मानिने एसयूभी पजेरो अब भने इतिहासको एक हिस्सा मात्र बन्ने भएको छ । यसको उत्पादक कम्पनी मित्सुबिसीले अष्ट्रेलियामा यसको अन्तिम ८ सय युनिट उत्पादन गरे पश्चात अब यसको उत्पादन सधैका लागि बन्द गरेको छ ।

सन् २०२० को वर्षमा कम्पनीले इतिहासकै सबैभन्दा बढी उत्पादन लागत घाटा व्यहोर्नु परेको र यसबाट उम्किनका लागि पजेरो एसयूभी बन्द गर्न लागेको बताइएको छ । पजेरोको उत्पादन घरेलु बजार जापानमा पहिले नै बन्द भइसकेको छ भने यो वर्षको मार्चमा अन्तिम संस्करणको नाममा यसको बिक्री हुनेछ ।

कम्पनीले उत्पादन गरेको अन्तिम ८ सय युनिट भने अष्ट्रेलियाको लागि मात्र उपलब्ध हुनेछ । यसलाई फाइनल एडिसनको रुपमा बिक्री गरिने छ । यसमा फाइनल एडिसनको ब्याज, एक कन्ट्रास्टिङ बोनट गाडी, प्लास्टिक बुट लाइनिङ, एक लोड लिप प्रोटेक्टर, कार्पेट फ्लोर म्याटका साथ लेदर बाउन्ड सर्भिस म्यानुअल उपलब्ध हुनेछ ।

सो पजेरोमा ३.२ लिटर फोर सिलिन्डर टर्बो डिजेल इन्जिन हुनेछ, जसले १९२ पीएस पावर र ४४१ एनएम टर्क जेनेरेट गर्छ । यसलाई फाइभ स्पिड टर्क कन्भर्टर अटोमेटिक र फुल टाइम फोर बाई फोर सिस्टमका साथ लो रेन्ज र लकिङ सेन्टर डिफ्रेन्सियलका साथ पेयर गरिएको छ ।

सो एसयूभीमा १८ इन्चको अलोय ह्विल, अटो हेडल्याम्प र वाइपर हिटेडका साथ पावरयुक्त फ्रन्ट सिट, रकफोर्ड साउन्ड सिस्टम, सनरुफ, लेदर सिट र एन्ड्रोइड र एप्पल कारप्लेका साथ टचस्क्रिन इन्फोटेनमेन्ट सिस्टम उपलब्ध छ ।

मित्सुबिसी पजेरो सन् १९८१ मा लन्च गरिएको थियो । यसको चौथो संस्करण सम्म विभिन्न अपग्रेड हुँदै आयो । विभिन्न देशमा पजेरो वाहेक अन्य नाममा समेत यसको बिक्री गरियो । मोटर स्पोर्टमा समेत यसले भाग लिएको थियो । सन् १९८५ मा तेस्रो प्रयास पश्चात यसले डकार र्याली जितेको थियो । सन् २००७ सम्म यसले कुल १२ प्रतियोगिता जितेको थियो ।